Tussen pot en pinte (16)

Van de grond goan

- Ha Achiel, ge ziet er zôo content uit?
Ge goa mij toch nie zegg’n dadde de Lotto gewonn’n hèt hé?
- Nêenek jongne Lowie, ’t is iets veel beters!
- Wadde, hedde ‘Win for Laaif’ gewonn’n toch?
- Banêek Lowie, ‘k meuge ne kêer!
- Hoe ge meug ne kêer? Wa meugde ne kêer?
- Ewew, ‘k meuge ne kêer van de grond goan mee mijn Irma!
- Joamoar Achiel, dienen vuilen proat, doar zijn de mejns’n nie mee gediend zille!
- Da meug toch geweet’n zijn damme ne kêer van de grond goan?
- Dakket nie mêer moet’n hôor’n Achiel!
- Allé, waddis ter doar nui erg an? Irma en ik in ons mande, daddis toch leutig?
- Achiel, ge moak mij koleirig hé vent.
Ge moet owver dienen vuilen dêefele nemêer klapp’n teeng’n mij.
- Daddis pertant spijtig, want Irma en ik hoan geiren g’had dadder bij zoe geweest zijn.
- Woarbij? Binst dadde goawdere… ‘k en meuget nie gedrôomd hèn!
‘k Zoe nog veel lievere vôortien doag’n beir voer’n…
- Joamoar Lowie, ge zoe nie allêene zijn diet zoen zien zille!
’t Goat doar mêer of tienduust man noar komm’n kijk’n os Irma en ik van de grond goan!
- Tienduust man? Ge doe toch nie mee in nen pornofielme hé? Gij en Irma?
Op awderen èwerdom? Hoeveel blèwe pillekes goade gij doarvôorn moet’n slikk’n?
- Allé Lowie, woar klapte gij nui owvere? Nen pornofielme?
‘k Moe wèw zegg’n dan der doar veel rondingen goan te zien zijn, daddis woar.
- Ziedet! In wukkenen hoerenboel zijde gij terechte gekomm’n?
Woarvôorne doede gawder dadde? Vôor ’t gewd?
- Vôor ’t gewd? E moar Lowie, we moeme der nog vôorn betoawn!
- Nog betere! Moar ja, da verstoak nui wel een beetjen,
want vôor a en Irma beejzig te zien,
doar zoe’k ôok nie te veel spêekers uitlegg’n zille…
- Joamoar, aw da vowk komt vôor niets kijk’n noar ons hé.
’t Is allêene moar spijtig dajnze ons hôogtepunt nie goan keun’n zien of hôor’n.
- Ja hallo, Achiel, daddis moar best ôok zekers?
En wannêer goaje van de grond mee Irma vôor aw da vowk?
- Ewew, ’t zaw den 30sten of den 31sten julie zijn.
’t Is te zien wukken weer dat is!
- Hoe? Wukken weer? Marsjeeret nie bij a ost an ’t reengnen is, toch?
- Bèjoat, moar tan goan de ballons niet op…

Marc Van Hulle