Dynes o Wrecsam wedi boddi ar ôl ceisio achub ci o afon

Fe wnaeth dyn o Wrecsam geisio tynnu ei wraig allan o afon ar ôl iddi fynd fewn i'r dŵr i nôl ei chi, clywodd cwest yn Rhuthun.

Roedd yn rhaid i Martin Lloyd gael ei dynnu allan o'r afon gan bobl oedd yn ymyl ond methiant fu'r ymdrechion i adfywio ei wraig, Gail.

Digwyddodd y drasiedi wrth i’r cwpl fynd â’u dau gi am dro ym Mharc Erddig ar gyrion Wrecsam ar 9 Rhagfyr 2023.

Mewn datganiad a gafodd ei ddarllen yn y cwest, dywedodd Mr Lloyd, o Stryd Bury, Wrecsam, ei fod yn cerdded o flaen ei wraig ar lwybr troed ar hyd Afon Clywedog oedd yn llifo'n gyflym.

Gwelodd fod ei wraig wedi mynd i mewn i'r afon i geisio cyrraedd eu labrador, Cadwy, a oedd mewn trafferthion yn y dŵr.

“Roeddwn i’n galw ‘Tyrd allan, tyrd allan’,” meddai.

Aeth Mr Lloyd i'r dŵr ond “doeddwn i ddim yn gallu ei chyrraedd hi", esboniodd.

Dywedodd William Cossins - a oedd yn cymryd rhan mewn parkrun ar y pryd - ei fod wedi clywed rhywun yn sgrechian ac aeth i helpu gyda phobl eraill.

Cafodd Mr Lloyd ei dynnu allan o'r afon gyda rhaff o gwmpas ei ddwrn.

“Roedd yn ormod o risg mynd i’r dŵr fy hun,” meddai Mr Cossins.

Cafodd Mrs Lloyd driniaeth CPR gan aelod o'r cyhoedd wedi iddi gael ei thynnu o'r afon ond fe wnaeth y gwasanaethau brys gyhoeddi ei bod wedi marw yn y fan a'r lle ar ôl iddyn nhw gyrraedd.

Cofnododd y cwest ei bod wedi marw'n ddamweiniol a'i bod wedi boddi wedi iddi fynd i'r dŵr.

Dywedodd y crwner: “Mae’r amgylchiadau’n drasig dros ben. Fe gollodd Gail Lloyd ei bywyd wedi iddi geisio achub ei chi."