Trywanu Rhydaman: Canmol ymateb staff a disgyblion

Mae prif gwnstabl Heddlu Dyfed Powys wedi canmol staff, disgyblion a'r gymuned am y ffordd y gwnaethon nhw ymateb i achos o drywanu yn Ysgol Dyffryn Aman.

Mae'r llu yn dweud bod swyddogion ychwanegol yn Rhydaman a Cross Hands dros y penwythnos, wrth iddyn nhw barhau i ymchwilio i'r achos.

Ddydd Gwener, ymddangosodd merch 13 oed yn Llys Ynadon Llanelli i wynebu tri chyhuddiad o geisio llofruddio a cafodd ei chadw mewn uned ddiogel i bobl ifanc.

Dywedodd Richard Lewis bod "staff a disgyblion yn haeddu canmoliaeth".

"Mae angen canmol teuluoedd disgyblion a staff hefyd am beidio â chynhyrfu wrth iddyn nhw aros am newyddion yn dilyn y digwyddiad."

Fe ddywedodd bod "y gymuned gyfan" wedi dod at ei gilydd.

Fe gafodd dwy athrawes - Fiona Elias a Liz Hopkin - a disgybl yn Ysgol Dyffryn Aman eu cludo i'r ysbyty yn dilyn y digwyddiad ddydd Mercher.

Nid oedd yr anafiadau yn peryglu bywyd, ac fe gafodd y tri eu rhyddhau o'r ysbyty erbyn y diwrnod canlynol.

Dywedodd llefarydd ar ran Heddlu Dyfed Powys: "Bydd cynnydd ym mhresenoldeb yr heddlu yn Rhydaman a Cross Hands dros y penwythnos, wrth i swyddogion barhau i ymchwilio i'r digwyddiadau sydd wedi effeithio ar ysgolion yn yr ardal."

Mae'r llu yn dweud wrth bobl i siarad gyda swyddogion fydd ar y strydoedd "os oes ganddyn nhw unrhyw bryderon am y digwyddiadau dros y dyddiau diwethaf".

"Os oes gan unrhywun wybodaeth a allai'n helpu ni gyda'n hymchwiliad, rydyn ni wedi creu adnodd arlein ac yn gofyn i bobl gofnodi unrhywbeth yno wrth i wybodaeth ein cyrraedd ni."

Yn y cyfamser, mae Ysgol Dyffryn Aman wedi sefydlu cronfa i Ambiwlans Awyr Cymru, i ddiolch iddyn nhw am eu gwaith.

Mewn datganiad ar y dudalen, maen nhw'n dweud: "Yn dilyn y digwyddiad yr wythnos hon, mae nifer fawr o bobl wedi bod mewn cysylltiad yn gofyn os gallant wneud cyfraniad.

"Rydym felly wedi penderfynu diolch i'r Ambiwlans Awyr am eu gwasanaeth gwych."

Ddydd Gwener, fe ddiolchodd yr athrawon gafodd eu trywanu i bobl am eu negeseuon o gefnogaeth.

Mewn datganiad, dywedodd Fiona Elias, Pennaeth Cynorthwyol yr ysgol: "O waelod calon, hoffwn i a'r teulu ddiolch yn fawr iawn am yr holl negeseuon rydym ni wedi eu derbyn o bell ac agos yn ystod y diwrnodau diwethaf.

"Mae fy nyled yn fawr i'r Heddlu, y Gwasanaeth Ambiwlans a staff y GIG yn Nhreforys am eu gofal arbennig a'u hymateb sydyn."

Aeth ymlaen i ddiolch am ofal yr Ambiwlans Awyr gan ddweud fod y digwyddiad yn "enghraifft arall o pa mor hanfodol ydy'r gwasanaeth yma i ni yng Nghymru".

Mewn datganiad ar wahân, dywedodd Liz Hopkin, Cydlynydd Anghenion Dysgu Ychwanegol ei bod yn "diolch i bawb am y gefnogaeth yr wyf fi a fy nheulu wedi'i chael ers y digwyddiad ddydd Mercher.

"Mae fy nyled yn fawr i'r holl wasanaethau brys am eu hymateb cyflym ac am y gofal a roddwyd i mi ac eraill a gafodd eu cludo i'r ysbyty."