Berichten van 7 augustus 2006 tot 13 augustus 2006

Wuk damme wieder ol deien up é dag

Snuchtens vroeg gingn we de koeien melkn mit dhand.je zat up é blokstoel bi de koe mi é seule tusschen je beenn,é mo trekn overans an twee speenn.Twaren toen nog ol ro koeien.Jadde taie koeien om te melkn en jadde gemakkelijke.De toie moste je meer jen handn toeduwn en trekn.We waren dikkers mi tween of drien om te melkn.Achter tmelkn toe mi die seuln melk na nachterkeukn om num of te roomn in nofromer die draoide mit nelectric.De room kwam ol é kleen buzetje in é seule en de vlotemelk ol é grodder buze in é kupe.De vlotemelk gaven we toen an de kouvers en de zwienejoen.Ekee in é weke goten we toen de room in de keirn en we keirdn toen.De keirn moste ezo é drikart toet é eure draoien en jadde toen butter.Kpeisn do djuste up é sprikwoord ok dao schrieven over butter:”Je kut nie ol en,vele butter en vette mesens”.Tis zekers omdan de mesens osan iepn an tkeirn.die butter was toen no de kelder edaon en most ekneed zien om ol twater derut te duwn,entoen in roln van é kilo of é oven kilo é daon zien.Mi moedre verkochtte toen de butter ébitje thus,mo ze gieng ook no de mart dermij nor Ieper.Ken nog mij ewist no de mart in Ieper.Moedre en nog andre boerinn stoegn dao in é reke in dhallen mi nulder mande mi butter bie nulder.En de buttermarchans kwamn dao en ze paktn mi nulder vinger é bitje butter en ze staken dat in nulder moend om te proevn,mo kweet ni mee onze dat toe uitspogen of nie,want je kut toch die butter nie ollemale upeetn.

Ja, en nu over etwot anders: die beestn we mosten dat toen ollemale messchen mit de grepe en de korwagn en na de messing voeren.Ze mostn ook ollemale teetn en. Ot winter was en tvroos enoug om mes te voeren,toen stakn we de karrn in de messing en we laddn mes mit de grepe.Den eenen ladde tmes en en andern voerdet na tstik.Up tstik moste je dat mes oftrekn,olle acht stapn é noop.De reken mostn ook acht stapn van mekaar zin.Dat was ton om later open te smittn,ook mit de grepe.

Vroeger

Twas toen ook è schoonn tied,mo ja twas vele meer handwerk.Mo ja twas ook meer volk op dhofsteen.de menschen adn geen zuk é beestn lik nu.Lik wieder,wieder an misschien é koe of dertiene,é twintieg jonge beestn,en é zwienemoere of tiene.De boern  adn biekan ol é knecht en é mesen.Ot oest wos gingn wieder noest gaon afdoen met de pekmachine die was voortetrokken deur nuze drie perdn.En achterna mosten we toe nog ol die boendels uprapn en in stuken zetn.Ot stief droog were was mosten we toen achter enige dagen die stuken geste en terwe inhaln mi de wagen en de perdn.twas osan met de staonde wagen,tis te zegn é wagen die up tstik was an tlaon en een die in nhangaar was an tlossen.Twas nogal lastig werk en tmoste nogal zere gaon,beest dat tschoonwere was. Mie vadre ad een van deerste é pekmachiene é kocht,twas é masey-harris. Nu om vors te doene ik vorkte nogal dikkers up tstik,tis dao dak nogal é bitje spiern é kwikt en,up tstik aje nog ottemets é koed wiendige.Twas zwaor werk,twee boenels mi ekee omhoge steekn,mo ja tvoer vulde ezo zere,é je moste ook zien danze nie mosten wachtn in nhangaar.Ken nu nog die lange vorke wamei dakke zovele schoven na boven é stoken en.Ja,in nhangaar was took zwaor werk voe drie man.Een die vorkte ,een die benaar smeet en een die tweg lei.Tkwam lastiger ot te kee omhoge moste é smeten zien. Nu, ot nnoest é kee in tdroge was,was tol vele. Toen é tid later kwam de desmachine,mo we mosten ze zelve haln met de perdn.twaren zwaore machinn;jadde nduvel die de desmachine dei draoin,toen aje ndesscher en olachter stoeg de presse.En die drie mosten schone in é rechte reke staon,want ze mosten olledrie verboendn zin mi é lange bree rieme om te werkn mi de desmachine.

Die menschen moste ol eten kriegen snoens en snavens,de vrouwn adden nog é bitje werk wi voe ol dat teten te makn.Nulder aanzichte van die mann was oe zo zwort lik kweet niewukke van tstof.