De nieuwe gevangenis met al de pro en contra's stond geruime tijd in de belangstelling en zal er alvast nog dikwijls komen in te staan. We hadden onlangs een interview met Piër van Tatjes. We kregen op onze vragen enkele gevatte antwoorden...

Piër wat is uw mening omtrent de nieuwe gevangenis die er dra zal komen?
Iëst en vèrral meniër wille'k â loëte wéite dâ'k vriëdeg groeitsj ben dâ ge mèi-j-ouitkiest vèr e poër vroëge on te stelle. En vèr nâ t' antwaurde op â vroëg. Zelf èmme'k nog nuët in 't prézong gezéite mor ik èm mèe loëte vertèlle dâ't uëg tait is datter e nief komt.

U bent nogal vaak vlug op de hoogte van de ontwikkelingen in de stad. Weet u toevalig meer over de nieuwe gevangenis?
Awél meniër, woër dâ ze goë komme dad'èmme de mènsje verlèje wéik kènne léize in sommegste gazètte. Ik goën d'r mè ni-j-auver ouitspréike of dâ 't nâ de goej ploitsj is of ni, doër moeje'k mè ni méi. Ge wètj, vèr den iëne zâ dâ goe zain en vèr den andere zâ dâ ni goe zain. Mor ik èm toevalleg mè ne persuën geklapt die auver twië w¨éike in de Buëmait on 't potrètte trèkke was, zuëgezèit in de gebiere van de ploitsj wordâ 't nief prézong zouë komme. Dâ was ne vrië zjantiejen tip en ge kost dor uëk isj iet on vroëge. Ik èm on dië mènsj gevroëgt vèr wâ datten faitelaik on 't portrètte trèkke was van em ploitsj wordâ niks'n stoët... Ge verstoët, ik kom attait em bitsje op man kausen af, mor ik blaif op manne kivief nowô!

En? Heeft dat heerschap dan ook op uw vraag geantwoord?
Vanèigest dadde. Diën tip éi mè gezèit dâ't vrië schuën gingk wèrre. De mènsje datter moete verblaive goën éir touis voele in dâ nief spel. Ik èm d'r straks al gezèit dâ't ne vrië zjantïejen tip was, en dâ zain giën léigene want â-j-éi mè¨'n tiëkeningk gegéive van dem binnenkant van't nief spel. 't Is te zegge van 't géin dâ ze proppozéire. Wâ dâ nâ ni gezèit is dâ't zuë zâ wèrre nowô.

Piër toont ons de tekening die hij van de persoon ontving en wij waren zo vrij hiervan een digitale opname te maken die wij bij onderhavig artikel voegen.

Piër nog een laatste vraag. Welke bestemming moet de oude gevangenis aan de Sint-Jacobsstraat volgens u krijgen?
Daddis vanèigest nen anderem botram nowô. Faitelaik èmme'k d'r uëk al zitten op pèize en volgest mèi kènne ze d'r 't best em fiëstzoël vâ moëke, dâ me vedrom af en toe-j-isj kènne gon danse gelèk as in den tait in 't Kauningsof in de Dikstroët.
Wie wètj géive de pompiers tèn vedrom ginnem bal gelèk as vroeger, en de Dongstroët en den Aavéidéi... Mè dâ ge d'r nâ toch auver begintj... Ik èm op nen oëvet isj zitte tiëkene en ge kraigt dâ vâ mèi, mor ge moet dâ dervéir nij-on alleman loëte zien zènne. 't Zain twië tiëkeningskes, iën van de kant van 't Prézongstroitsje en iën van den achterkant. Dâ ge dad' on e poër mènsje nikke loitj zien, dâ kan mè nâ ni géive, mor alleman moet man koeinsjtwèirke ni-j-'n zien nowô!

Piër wij danken u voor uw bereidwilligheid en voor uw medewerking aan dit interview.
Ach mènneke, dâ kan mè-j-ammel ni géive. Azze'k mor kan èlpe!