|
'k Zouë in mam plichte tekèrtschiete moeste'k van déize kiër mam joëremèrtbeléivenisse ni loëte wéite, nowô. Awel ier is 't rèloës vâ van de joër...
'k Ouë téige man èige gezèit dâ'k van déize kiër wâ béiter gingk ouit man uëge kaike as d'ander joëre! Ge wètj of ge wètj dâ ni, mor de gepasséirde joëre atte'k réigelmoëteg isj iet véire nowô azze'k nor de joëremèrt gingk. Ik wéit ni of dâ ge't éir nog rappeléirt, mor auver e joër of twië wazze'k vertrokke mè man sondogse broek oën en kwampe'k dor méi touis vol koejestront... Verlèje joër was't al iet béiter en van de joër...
Ik was ni te vroeg vertrokke van déize kiër. 'k Pèisdege, azze'k te vroeg den iëne of den andere téige 't laif luëp tèn kan 't goe zain dâ'k om tien iere al nimmer ouit men uëge zien! Mor ik ouë-j-èm bitsje korrozje déir 't fait dat er in 't stat zuëvéil stammenéis nimme zain as vroeger...
'k Was nog mor goet vâ véiren op 't Vèstsje en al mè ne kiër uërdegeke datter immant zèi: "Doër zî, de Piër"... "Aj, gotverdomme" zèi'k "wie dâ me doër èmme"... Nâ moete'k iërlaik woër zègge dâ'k ik ni wist wie dâ dâ was, mor ne mènsj wil dâ ni zègge, nowô... Dië zèi vanèigest: "Ge kèn mè toch nog?". Ik antwaurdege: "Dâ's zéiker dâ", mor ik wist et van dem balange nig ni zènne. "Wor is den tait nortoe?" zèi dië kèirel. En ik... "Dâ was ne schuënen tait, nowô jonge!"... A vroeg oe dâ't mè de die vâ mèi was. Wad' antwaur ne mènsj dor op? Ik zèi: "Z'is nog gin oër verandert!". "Alléi gèi" zèi dië kèirel "is't nog attait zuë'n fèlle mokke?"... Ik zèi: "Nenië, ze kan nog attait éive nèig zoëge as vroeger!"... Wâ dâ'k ik nâ ni verwacht ouë, dâ was dâ de die vâ mèi kèrt achter mèi moet gekomme zain. En op de momèntj dâ'k ik zèi téige dië kèirel dâ ze nog éive nèig kost krèfte as vroeger, stont ze toch wèl in iëne kiër nèffest mèi zéiker!
Z'éi mâ bè mannen èirem gepakt en z'is mè mèi déirgestapt... Ten iëste wéite'k nâ nog attait ni wie dâ dië mènsj was die mè dor oëngesprauken éit en ten twidde kost er van de joër ginne stront ô mam broek ange, want ik bèn on de biëste ni gerokt! Z'is in een kolèire mè mèi nor ouis getrokke... 'k Em kènne den afwas doen en de koer schiere...
Schuëne joëremèirt van déize kiër!
|
