De leagere schole van Hazenberg (2)
xml:namespace prefix = o ns = "urn:schemas-microsoft-com:office:office" />
Noa de eerste kwam de tweede klasse. Wij hebt doar un paar meisters en juffrouwen ehad, den enen nog strenger as den andern. De name bunk vegeaten moar de kuurn nog niet. Zo hadde wi'j un juffrouw die altied beaden met de ogen los um te kieken wie of ut dörven um onder ut beaden kattekwoad uut te halen. Ik mot tut mien schande zeggen dak iets edoane hebbe toen woar ak now last van ekregen hebbe. Onder de Biebelse les zag ik Henk te K. heel interessant van 2 latjes en un stuk elastiek un piel en boage maken. Ik dachte dat kan ik ook en maken stiekem onder de banke ook zoiets. Opens schot de piele uut de boage en genau in mien rechter oge. De klasse en de meister schrokken  zich te bastend en in minder dan gin tied wier ik afevoerd noar de huusdokter Keyzer den recht tegenoaver de schole wonen. Ut oge wier bekekken en ik krege un zwarte lappe der veur ebonnen en mog de rest van de dag op huus an. Ut dei verekte zeer moar noa un paar weake konk der al weer goed met zien tut veur un paar joar geleden ut zicht in dat oge steeds minder wier. Toenk bi'j den oogarts terechte kwamme vrogen ze direkt of ik al es un hard veurwarp tegen mien oge had ekregen en toen hek alles moar opebiecht. Un paar weake later hebt ze mien operiert en un ni'je lenze der in ezet.
Der ging gin kwartaal veurbi'j of wij kregen un anderen meister of juf. Ene van die meisters had as hobby sterrenkieken (nea niet uut un buuksken met blote dames) moar echte steerne die 's oavonds an de locht stoat. Al gauw wis de hele klasse iets af van de poolster en van de Grote en de Kleine Beer. Doar hew later nog knoepens völle an ehad toen wi'j bi'j de padvinderi'je waarn. Wi'j vedwalen nooit want den Groten beer brach ons altied weer thuus.