|
Nééuw we zien da nie mee
In jun herte, j'ét è bitje spiet
je schudt èkki jun ooft
en je zeg nééuw,
Nééuw we zien da nie mee
E géet an è stokkeband in de stroate
't koetje va de werkman te zien boate
è wuuf me è jok goan melken in de wee...
Nééuw we zien da nie mee
E smit in ze smisse, slag op slag
op 't aambeeld, woardat er è peirdiezer op lag,
è peird in de travaillie zéér gedwee ...
Nééuw we zien da nie mee
En ommelof me plokken schoon om zien
en me olde zakken up under kniên
en plokken van snuchtens toe snavents ...
Nééuw we zien da nie mee
Oh we, neeuw we zien da nie méé
en oaringmarsjang me oaringen an 't leuren
me kieten en melken, je meug ze keuren
en mo roepen :" levaers versch uut de zee" ...
Nééuw we zien da nie mee
En voaders è moeders me è groat menaage
in d'oarmoe, mo vul courage,
zestien kienders olie joare een
en ottemets ekki twéé .. .
Nééuw we zien da nie mee
E nunneke devootlik è vroom
me è kappe lik de kruune lik è boom
én roks toet an eur groaten tée ...
Nééuw we zien da nie mee
E paster die me oenz'n heere goenk
in stroatjes woard't 'n biekan verzoenk
en d'n messediender die 't belletje kloenk
kée up kée ...
Nééuw we zien da nie mee
E wiettewoagen akke kadjakke
de peirden stief up nunder gamok
me zwarte lintjes olie twéé ...
Nééuw we zien da nie mee
En nog zovéele diengen van olle daagen
da nuzze joengens misschien nog zaagen,
mo nuzze kléenkienders nie mee
Nééuw we zien da nie mee
Categorie:GEDICHTEN
|
