06-05-2006 om 23:43 geschreven door Tineke  

Veujoar

t Swaarte laand begunt te gluien,
woazent oet zien glìnneghaid.
t Zoad is kiemd, begunt te gruien,
moakt mie t zicht wat minder vraid.

De grieze locht begunt te vluien
woazemt oe zien ainzoamhaid.
t Licht is schel, begunt te muien,
moakt mien dag voldoan en braid.

Boeten loop ik t leven te oamen
dat mien allìnt weden moakt tot soamen.
De noatuur slagt mie oet t lood.
As t kiemende zoad begunt te gruien,
t swaarte laand begunt te gluien,
veur even t kind in moekes schoot.

06-05-2006 om 23:17 geschreven door Tineke  

n Aander

Ik proat met die,
moar doe heurst mie nait
ik proat met die,
doe heurst mie wel
moar begripst mie nait,
ik proat met die,

moar t is nait das t mie nait begripst
ik proat met die,
moar doe denkst aan wat aans,

doe bist n aander,

en toch wol ik dast doe
n aander wast dei allain moar luusterde
n aander en toch
dat ik miezulf zai in die
en doe toch 'n aander bist

ast dat wilst.

04-05-2006 om 23:36 geschreven door Tineke