Azze'k dâ nâ de lèsten tait ammel uër op den tèllevies en léis in de gazette, magge'k faitelaik kontèntj zain dâ ze mè van touis ouit nuët nor gin schaul bè de poëterkes doen goën èmme... Amai, manne frak! Z'èmme mè wèl nor een kattelikke schaul gestiert, mor dor woëre gin pasters of gin poëterkes op dië momèntj. Nogal e gelik, want gelèk dâ'k ik attait sjans èm zouën ze mèi dor uëk wèl mè man sjokkedaize g'at èmme, doër maugde gil gerist vâ zain...
Nâ ni dâ'k mè d'r zouë loëte van doen èmme zènne... En dorbèi, 'k was ginne gemakkelaike azze'k klèin was... Véire dâ'k in de waskouip gingk moeste z'ammel zien dâ z'ouit de gebiere woëre. 'k Zouë nuët man kalsong ni-j-ouitgedoën èmme aster nog immant in de gebiere was. 'k Moet et zègge gelèk dâ 't is, ik was nogal nem beschomde in diën tait... Dorachter is dâ wèl stillekesoën verandert!
Biskoppe, pasters, poëters, awèl ik ouë d'r toch een ander gedacht van... 'k Oüë nuët ni gepèist dâ die dâ zouën dèirve, mor ge ziet dâ ne mènsj vâ niks moet verschiete nowô! Ier en toër moete d'r uëk zisterkes gewéisd' èmme die-j-éir iet gereskéird' èmme... Ik kan mè dâ nâ ni véirestèlle... Ik èm nâ-j-uëk in de Marikolle nor 't kadolleke gewéist, mor die zisterkes die-j-èmme nuët auver zuën dinges ni geklapt zènne! En 'k moet nâ zègge dâ 'k in diën tait giëne liëlekoërt was!
'k Em nog 'n taike misdienèir gespèldj' uëk, en doër èmme'k uëk nuët niks ondervonne, bouite dâ'k nikker een goej toeffelingk g'at èm van den onderpaster omda'k on zanne wain gezéiten ouë en omdâ'k de déir vâ zan kliërkas, wordâ zan kazouivels inongke, vastgedoën ouë en de sléitels weggesméiten at! Was dad'n pantomiene! De mis is bekan tien menniete loëter begost, omdâ de paster ginne kazouivel ouë en ik vont dië sléitel vanèige ni derèkt! 'k Em een gil mis mè-j-'n ruë koëk gestoën... Was dad'n kokkenaut dâ dië mè d'r gegéiven ouë... Binsjt de konsèkroësse kosten mè nog verschéire, gelèk as datten nor mèi kéik. 'k Mindege goet dâ de paster nen dievel gewèrre was, azuë-j-e koppel uëge...
Kèrt nôdien bènne'k gestopt mè misdienèrke te spéile... Ten iëste ouë'k man goesting van die-j-iën kokkenaut en voersj wazze'k benaat azze'k dâ te langk gingk doen dâ ze gingke vroëge vèr loëters uëk paster te wèrre... Oe moeste'k dâ gon ouitlègge téige ammel dâ jongk vraavolk???
Piër van Tatjes.
Stadszichten...
