Die Bedeesdes
((Adapted from: Les Timides (Jacques Brel) - 1964))
Composer(s): Jacques Brel - Naòmi Morgan - Bernard Odendaal
Performer(s): Herman van den Berg - 2007
Versions In Other Languages:
1969 - Verlegen Frieda (Liesbeth List)
1984 - Syntymässä Säikähtäneet (Susanna Haavisto)
Die bedeesdes
hulle vroetel
raak verstrengel
begin te hakkel
Hul verbeel hul
hoe manhaftig
half almagtig
is hul wil
Maar die winde
van die wêreld
laat hul dwarrel
soos afvalblare
Hulle fladder maar teen jou deur aan
met 'n tas in elke hand
Die bedeesdes
volg hul skadu's
die gedaantes
van wesenloosheid
Net die skemer
weet vir seker
al die redes
vir hul skroom
Hul maak buigings
en verskonings
bloos skakerings
van felle kleure
Hul wil liewer net hulle gang gaan
met 'n tas in elke hand
Die bedeesdes
droom nog somtyds
van 'n blomtyd
daar voor hul spieëltjies
Strop 'n das aan
durf die straat aan
maak die pap aan
na daai buurt
Dan verdwaal hul
dit verwar hul
menseskares
wat oral skarrel
Hul wil ysterklou in die grond slaan
met 'n tas in elke hand
Die bedeesdes
swig uiteind'lik
voor verleiding
teen afslagpryse
Raak dan triest en
lus vir bieg en
heel verdiep in
eie siel
Maar 'n straatvrou
vind die praatwerk
heel te swaar werk
iets vir 'n trouvrou
Daarom wys sy hom waar die deur staan
met 'n tas in elke hand
Die bedeesdes
ryp tot grysaards
wat in wysaards
nooit sal ontpop nie
Daar's net voortgaan
nooit-oorboord-gaan
en dan doodgaan
waar als stop
Durf niks sê nie
durf nooit vloek nie
durf nie roep na
wie liefde soek nie
Hulle sug miskien van 'n bang smart
sterf met tasse op die hart
|
