TUSSEN POT EN PINTE 44

3 nieuwe Theo’s

  -       Ah Achiel, wa schiwtere? Ge zijt zo snew geklêed. Ge ziet eruit gelijk nen grèn andjuun!

  -       Ja Lowie, lach moar tsjaloezigoard. Ik zij deur ’t stad geïnviteerd noar de Theo’s!

  -       De Theo’s? Waddisdadde?

  -       Ewew, daddis een feestjen woarop dander beeldekes word’n uitgedêewd!

  -       Beeldekes Achiel? Wukken beeldekes?

  -       Van den Herbakkere diedop den Moart stoat, mee zijnen zwoaren zak en die katte tuss’n zijn bêen’n!

  -       Aah, en wie krijgter azô een beeldeken?

  -       Da zijn middenstanders of bedrijv’n dient vrêed goe gedoan hèn pesseeden joar!

  -       Zijnder azô in Eeklô?

  -       Jabejoat, en vele want ter zijn zeejv’n Theo’s uitgereikt!

  -       Awzekere, an wiene?

  -       Ewew, die klèn’n van Hermies uit den Boeloare geweest, Pieterken, den dienen verkôopt nui gèszoad via de
          kompjoetere. Ge moe zewve mee gêen zakk’n nemêer sleur’n, den facteur komt ’t zoad in a boate giet’n!
          En weete wien datter ôok nen Theo gekreeg’n heet?

  -      Nêek, vertewt op!

  -      Annie Vandewalle, die coiffeujse mee da zeuntjen die gêen ploatse nemêer heet op zijn lijf want hij stoa vow mee
         tattoes! Annie krijgt azô een beeldeken omda ze aw verre tneengentig joar coiffeujse ist!

  -      En wien woart er nog bij?

  -      Sten en da vlietig dingsken da bij hem wirkt, Jatie of azô, van La Marieze, da restaurant in de Stoassestroate woar
         dadde allêene moar bêest’n en groensels keunt eet’n, dien ze zewve gekwêekt of geplukt hèn.

  -      Speesjiaw!

  -      Ge meugt grust zijn. En ’t stopt niet hé, der woas ôok nog nen Theo vôor die twie wijvekes van Sieloe!

  -      Sieloe, waddis dadde?

  -      Ewew, daddis hoarsjampoo vôor de kientjes mee amow beestjes!

  -      Kientjes mee amow beestjes?

  -      Nêeje Lowie, sjampoo mee amow beestjes en mee een vertewselken…

  -      Allee, ’t woar nen schônen oavend?

  -      Ge meugt grust zijn, Lowie, want mee Roosken van Ackere uit ’t Poaterstroatjen als preesentatriesse woaret echt af.
         Allêene, ik vinne dat ’t Stad zijn eigene ôok drie nieuwe Theo’s hoa keunen geejven!

  -      Wukken Theo’s zoet ’t Stad verdien’n toch, Achiel?

  -      Ewew, den Theo Patience vôor de awtijd moar langer durende renovoasje van den Herbakkere.
         Den Theonkruid vôor den fantastieschen middenbirme. En in extremies, den dag vôor de uitreikinge,
         den Tarmac Theo vôor awder Koajstroate!

Marc Van Hulle