Categorie: Tussen pot en pinte

TUSSEN POT EN PINTE 42

Nen spion op nen vélo

   
   -  Ha Achiel, ge ziet er goed uit!

   -  Ja Lowie, ’t is vakanse hé. We meugen ne kêer wa langer sloap’n, een terrasken doen op de Moart,
      een frietjen stekk’n bij Karientjen van Den Beir, een wandelingsken moak’n in ’t Lêen,
      een koartjen legg’n in den Eiketak…

   -  ‘k Hôore ’t aw, ge zijt nie vele in ui kot?

   -  ‘k Hè aw veel te lange in mijn kot moet’n zitt’n Lowie, godganse doag’n bij Irma, ‘k zwêeret uit,
      daddis hoegenoamd gêenen kado zille! En gij, nog gêen verlof?

   -  Ho Achiel, vôor mij is gôole doag’n vakanse! ‘k Zij kik in prépensioen hé!

   -  Ha ja, tan é kik een pensioenfêeste gemist pejzek…

   -  Toch niet, Achiel, ‘k ginge een grôote fêeste geejv’n bij de Paveetjes tenden de Meulestroate moar mee
       korona ging da niet hé. Moar binnenkorte goa’k er ne lap op geejv’n, want der is iets op komste vôor mij!

   -  Ha ja, watadde?

   -  Ik goa nen serjeujzen priem krijg’n!

   -  Nen priem, Lowie? Der ligg’n toch vanzeleejv’n gêen zonnepanêeuwn op a dak? Of der stoan toch gêen
      lôolijke groene gèskonteiners vôor a deure?

   -  Nêet jongne, ik goa nen priem krijg’n van VeeTeeEm!

   -  Van VeeTeeEm? Van de televieze? Van Katrientjen Moerkirke? Doar zoe’k ôok wew ne kêer nen priem
      wiw’n van krijg’n! En wad anders ôok!

   -  ’t Is nie van Katrientjen Moerkirke, zij gerust.

   -  Toch van dienen Bo Van Spilbeke niet? Of van Patriek Vanmompele?

   -  Nieje Achiel, ’t is nen priem van de redakse omda’k nen schôonen tip gegeejv’n hèn vôor in awder nieuws!

   -  Moeste doarvôorn noar VeeTeeEm lôop’n? Woart AVeeEs nie goe genoeg toch?

   -  Van da Beirtran De Keuninck doar weg is, interesseert AVeeEs mij nie mêer.
      Tenandere, ’t ging over minister Peeters!

   -  Minister Peeters? Moar Lowie toch, Kries Peeters is aw lange gêenen minister nemêer!

   -  Joamoar Achiel, ’t goat owver Liedieja Peeters, van de blèwe! Dedie is hier peseede weeke ne kêer
      komen kijk’n, mee heuren vélo!

   -  Nen minister mee nen vélo, daddis ôok nieuw hé? Hoe komt dadde?

   -  ’t Schijnt dan alle blèwe ministers moet’n inleejveren vôor de boetes te betoaw’n van Kwakkebie, ge
       weet wew, dedie mee heur poedelkeshoar die hier en doare wa factuurkes geschreejv’n heet.. Doarom
       is awderen otto gewisseld vôor nen vélo. En da kwam Liedieja Peeters vrêend goed uit!

   -  Woarom Lowie, ze kwam toch vôor te zegg’n dat z’heur stirk moakt dat de Rink der hôogswoarschijnlijk
      misschien wew zoen komm’n, mee tijd en boterhamm’n?

   -  Da woart heuren dekmantele Achiel, in feite woar ze underkover vôor nen anderen opdracht. Geef toe:
      os ge van de Stoasse noar de Ringloane moet, tan rijde toch mee de vélo deur de Zuidemoerstroate en
      de Meuje? En toch nie rond langs de Moart, de Meulestroate, de ovonde en de Leopowdloane?

   -  Daddis woar, de kortste weg is da niet. Moar woarom hee ze dat dan gedoan?
      Rijd ze zôo geirne neefest Kriestofken?

   -  Ewew Achiel, ze deejt dadde vôor te spioneer’n! Ik hè ghôord uit goeie bronne da ze noar hier gekomm’n
      is mee nen speciaw’n opdracht van de premjee!

   -  Van Alexandere, alles vôor mij en niets vôor een andere?

   -  Ja, Achiel, van dendienen. Hij hoa ghôord damme hier in Eeklô iets speciaws hèn, dajnze nieverst ewders
      in België hèn en hij is doar peirdetsjaloes van! Doarom hee Liediejatsjen zôo verre moet’n rondrij’n mee
      heuren vélo, neefest Kriestofken.

   -  En woarover goat da dan Lowie?

   -  Ewew, z’ist tsewfs gestopt an d’ovonde vôor ne kêer goed te kijk’n en vôor in den duik wa foto’s te pakken!

   -  Vertellet mij zêere!

   -  Bovenandien is Bobken, die nu toch een tijdjen gêenen scheepnen ne mêer meug zijn, vôor twie moand’n
      noar Bruusele verhuisd! Doar goat hij, tôope mee ’t verslag en de foto’s van Liediejatsjen, de regeeringe
      vôoruit hewp’n en tegelijk Eeklô op de koarte te zettn!

   -  Hoedadde?

   -  Ewew mee een plan om teengn te noastejoare in gôow Bewgen overaw azô nen fantastisch schôonen
      middenbeirme an te legg’n: de Eeklôosche hovingen!

Marc Van Hulle

Tussen pot en pinte 36

Gekleurde stoaskes

  -       Ha Achiel, hoe is’t? Een pintjen?

  -       Nêeje Lowie, geef mij moar een woaterken!

  -       Aw zekere, een woaterken, wa schiwtere?

  -       Ewew ik wille een beetje vermoageren.

  -       Ah, heeft Irma gekloagd toch?

  -       Bènêes, moar ik wille den donderdag nog awtijd mijn kaffeetjen bij Neleken en Pieterjan van
          de Witte Zwoane goan drink’n.

  -       Ee Neleken gevroagd vôor te vermoageren dan?

  -       Ôok niet Lowie, moar ozze wa smallere zijn dan keunek gemakkelijker tussen da moartkroam en de
          muur kruip’n vôor binnen te geroak’n in de Witte Zwoane…   

  -       Ja jong, wiens gedacht woar dadde? Ne mens zoe wew wegblijv’n van de moart…

  -       Toch nie, Lowie, want op de moart hôorde en ziede nogaw wadde zille…

  -       Aw, vertewd op!

  -       Ewew, binst da’k mij tussen da kroam en de muur van de Witte Zwoane an’t wring’n woarek, zaggek da
          de scheepninnen Anneken en Isauraatjen noar da kroam van de kèss’n ging’n.
          ‘k Pejze, doar moe’k ’t fijne van weet’n!

  -       En? Hèjn ze panties mee zjartels gekocht?

  -       Nêes Lowie, z’hèn zeejv’n poar gekleurde stoaskes gekocht. Een poar voor Luuksken,
          den burgemêestere, en zes poar voor de scheepn’s!       

  -       Daddis ôok wew oardig?

  -       Ge meugt gerust zijn, doarmee hèk awder gevowgd. Ze gingen dermee noar de Poaterskirke en doar
          stond de reste van ’t schepencolleejze te wacht’n op awdere.             

  -       Spannend hé?

  -       Joat Lowie, moar ’t wordt nog spannender. Ik zij achter awdere binnen gekroop’n in de Poaterskirke
          en wa stond er doare? Nen cameraploeg!

  -       Aw zekere, van AVS?

  -       Nieje, toch niet. Moar ‘k hôordege awder wew afspreek’n dajnze van iedere scheep’n en van den
          burgemêestere een apoart fielmken ging’n moak’n, moar ze moest’n doarvôorn wew awder gekleurde
          stoaskes aandoen…

  -       Moar Achiel, ’t is gêen woar! Daddis tan gelijk bij die Bekende Vloaming’n dien in awderen blôot’n mee
          gekleurde stoaskes een fielmken gemoakt hèn vôor op Feejsboek! Den dien’n van ’t Rad van Fortuin,
          en Sjoon Dont, en Stan van Samang!             

  -       ‘k Pejsdeger ôok sebiet an, Lowie.

  -       Miljaar ge meugt toch nie gedrôomd hèn dad ons scheep’ncolleejze zukken fielmkes oppakt hé.
          Akkoord datter nen nieuwen wind is, moar daddister toch owvere hé?

  -       Gelukkig woarn’t andere fielmkes en al eejv’n gelukkig mee klêer’n an.
          Moar wèw mee gekleurde stoaskes.

  -       Wukken fielmkes zijnder tan gemoakt?

  -       Ewew Lowie, iederêen mocht één zinneken zegg’n, en ’t fielmken begon an awder hôofd moar stoptege
          an awder voet’n.

  -       En wukken zinnekes woar’n da tan?

  -       Ewew Luuksken den burgemêestere zejt: “Gêenen mondmasker an op de Moart, moakt a tan moar uit
          de voet’n!” En Kriestofken zejt: “Da gezoag over de Zuidmoerstroate, dat hangt mijn voet’n uit!”
          Windèj hoat ôok een scheuntjen: “Zone 30 in a stroate? Gedoan mee den zwoare voet’n!”       

  -       En wukken zinneken hoa Bobken?

  -       “Nie content mee den middenbirme? Doar voag’n m’ons voet’n an!”

Marc Van Hulle

Tussen pot en pinte 35

“Teveel groene virwe”

-          Ah Achiel, ge zijt te loate hé manneken

-          Ja, Lowie kweetet, moar ‘k kwamme van de Roete, ‘k sleege de Meuje in en an Patsjellies mochtek nemêer deure.

-          Ah ja, daddis mee dienen knip dan ze doar nui in êenen kêer gemoakt hèn.

-          Ja jongne, kwamme doar in nen kroezele terechte: Engelendoale, Roashekke, Burggroave, miljaarde
           dat bleeft duur’n êer da’k an ’t Lejken woare. En tan stondek stille in de Guldenspôorenstroate.
           ’t Is doarmee da’k wa te loate zijn. Moar da nie allêene.

-          Aw Achiel, verteld op. Een nieuw lief?

-          Moar bènêen Lowie, een nieuw jobken!

-          Een jobken? Gij? Wirkte gij? Daddis inderdoad nieuws!

-          Lach moar, ik wirke nui vôor ’t stad!

-          Ah da verkloart vele, ge weet toch wew dadde ‘wirk’n’ en ‘’t stad’ nooit in êene zin meugt gebruik’n hé…

-          ’t Keun mij nie schiw’n. Luuksken en Kriestofken hèn mij gebewd en gevroagd ozzek nie wa wiwdege
            komm’n schiwderen.

-          Schiwderen? ‘k Wiste nie dadde gij mee nen virfbustele kost wirk’n!

-          Lowie, die mann’n schiwderen nemêer mee bustels hee, daddis nui mee spêetmachientjes en mee row’n.
           Da goa veel zêerdere.

-          En wa moeter allemow geschiwderd word’n, Achiel?

-          Ewew, de trottoirs en de boane!

-          Ah ’t lijntjes dadde gij schiwdert?

-          Nêetendoet, zijn dikke gekleurde striep’n mee letters!

-          Letters? STOP zekers?

-          Nêeje, an de schow’n emme mee veel kleurkes ‘Zone30’ geplakkoasterd! En an de buushawte op de Moart
           emme ‘peuktegels’ geploatst en geschiwderd!

-          Peuktegels? Wa zijn dadde?

-          Ewew, da zijn feitelijk grôote sandriejee’s in den trottoir gekapt. Doar meugen de rôokers awder peukskes
           of stekskes in smijt’n.

-          Ze zoen de mensen beter doen stopp’n mee rôok’n!

-          Aw moatjen, moar dat doeme ôok zille!

-          Ja, hoe dadde?

-          Ewew, omme gedoan hoan mee dienen kleurboek van ‘Zone 30’ vroegt den burgemêestere an mij ozzek
           mee rôoje virwe an iedere schowpôorte ‘Rookvrije zone’ wiwdege schiwderen. Der woas doar nen
           specioalen rôostere mee letters vôoren gemoakt. Da vaw nogaw op zille azô nen rôojen band!

-          En ister an ’t stad azô veel virwe in awder magazijn?

-          Joat jongne: fluo, oranje, rôod, veel blèw,… Moar der is êen hoeksken in ’t magazijn woar damme nie
           meugen ankomm’n.

-          Ha ja, en wa stoater doare?

-          Daddis Bob zijn hoeksken. Doar stoater verschrikkelijk veel groene virwe, en ôok azô nen letterrôostere
           gelijk van die ‘Rookvrije zone’. We gingen da rôostere en die groene virwe moet’n gebruiken op den
           deurtocht. Moar der is nui gevroagd vôor nog een beetjen te wacht’n. ’t Past niet echt langs den deurtocht
           wat datter op dienen rôostere stoat…

-          Wa stoater op toch Achiel?

-          Ewew: ‘Onkruidvrije zone’

    Marc Van Hulle

                                                                                         

                                                               Tussen pot en pinte 34

                                                                     Eemerance, ’t is vakanse!

-          Ha Achiel, nog awtijd schôone een mondmaskerken an?

-          Joak Lowie, ’t sewfs ozzek op café goa

-          Hoe goat da tan, os ge wiwt drinken?

-          Ewew Achiel, Eddie van Patsjellie van de Bakkerei van de Ramblas hee mij azô nen plastiekenen masker verkocht
           woarmee dadde keunt eet’n, drink’n, muil’n, ’t sews a tand’n kuis’n os ge da wiwt! En dienen maskere zette kik
           op ozzek op tramar goa!

-          Goe gezien Lowie, ‘k zoe mij ôok wew azô nen maskere goan kôop’n, moar ik goat nie an Eddie vroag’n zille,
           moar an Nagibatje, dedie goa mij dat ôok we wan d’hand doen pejzek?

-          Veel keure Achiel, ’t is nooit tevele gevroagd an heur! En vertew ne kêer: noar woar goade op rejze vandejoare?

-          Op rejze? Nuij? Mee aw die coronamiezeere? ‘k Blijvekik schôone thuis!

-          Ge ging gij toch wew weg goan mee Irma?

-          Joak jongne, mee nen mobielhoom noar Dardennen, moar daddis nui ne mêer nôdig!

-          Hoe wiwde zegg’n Achiel?

-          Ewew woarvôorn goa nen mens noar Dardennen, Lowie?

-          Vôor een Choefken te drink’n? En een stiksken everzwijn teet’n?

-          Ôok ja, moar toch vôoraw vôor in de bossen en de struik’n te goan wandelen?

-          Ja, daddis woar Achiel, vôor een wandelingsken in ’t groen!

-          Ewew Lowie, woarom zoeme doarvôorn nog noar Dardennen goan?

-          Om dander doar boss’n en struik’n à volonté zijn!

-          Ewew, dedie zijnder nui toch ôok in Eeklô?ess

-          Ja, in ’t Lêen zekers? Op die boantjes?

-          Nêeje Lowie, os ge een Ardennengevoel van een boswandelinge wiwt, moeje de middenbirme in de
           Stoassestroate en de Meulestroate ne kêer overstreek’n! Tussen de tingels en ’t onkruid pejsde sebiet
           da je in La Roche of Oefalieze an ’t wandelen zijt!

-          Haha, Achiel, daddis nog ne kêer vakanse in eigen stad!

-          Ja, en ’t keu nog betere!

-          Hoe wiwde zegg’n?

-          Ewew, we moeme nui ôok ne mêer noar de zêe! Rotjen schuiv’n op ’t strand en aw!

-          Ah ja, mee dienen hôop zand dan ze nui weere op de Moart gesmeet’n hèn? Eeklô Bietsj!

-          Ôok ja, Lowie, moar ’t keunt nog veel betere!

-          Da goa je mij toch ne kêer moeten uitlegg’n zille!

-          Ewew, ik hè mij pesseede weeke mee Irma in de greppe gezet!

-          In de greppe vanzeleejvne!

-          Ja jongne, ik hoa mijn spannend zwembroeksken an gedoan, Irma heuren biekienie, die hier en
           doare wew een moatjen mêer hoa keunen verdroag’n, moar ’t is vakanse hé.

-          Hè gawder azô in de greppe gezeet’n?

-          Ja be joam, en w’hemme ons ingesmeird van top toe têen vôor zeker nie te verbrand’n. We hoame een
           friegoboxken mee sandwieskes en een fris pintjen mee, we woarme nogaw gezet zille!

-          Moar woarom zatte gawder azô in de greppe?

-          Ewew Lowie, da woart omda Bobken da gevroagd hoat!

-          Bobken, wukken Bobken? Toch dienen groen’n nie, zekere?

-          Toch wew, Lowie, Bobken hé gezejd damme in de greppe an de riolle moet’n zitten.
            Bovenandien, ge kostet leejz’n os ge doar zat!

-          Ja, wa stond er doare?

-          Ewew, mee grôote letters stond er an de riolle: ‘Hier begint de zee’!

                                                                                 Marc Van Hulle

                                                                       




                                                             
                                                                 Tussen pot en pinte (33)

                                                                           
                                                                     “Kriestofken is den slimsten!”

-          Ha Achiel, ‘k moeste ne kêer goe kijk’n, want ‘k zoe a nie herkend hèn mee dienen mondmasker op a totte

-          Ja Lowie, zwijgt er mij van! ‘k Zwêete mij stêendôod mee dienen dingere an.

-          Daddis zjuust, moar ’t moet hé, vôor da KOVIETbeestjen!

-          Natuurlijk Lowie, moar de maskers hèn toch veel verschiw zille. Dedie van Club Brugge bijvoorbeeld, zijn hôw goed,
            ze spann’n niet an d’ôorn, ze dekk’n alles toe en aw de mens’n kijk’n vriendelijk noar a.

-          ‘k Zoet wew gelôov’n dan ze vriendelijk kijken os mee azô een spew van Brugge anlôopt.
           ‘k Pejze dan ze kompasse hèn!

-          Toch nie Lowie, daddis mee die mauvene van den Anderlecht, tan hèn ze leute!

-          Ik lôope mee dedie van ’t stad an. Ge weet wew, dedie die gekocht zijn dôor den Eeklôoschen Donawd Muille?

-          Den Eeklôoschen Donawd Muille, wien is dadde?

-          Ewew, Stêenbeke van de keukens vanop den Teut!

-          Ha, Kanon zijne zeune?

-          Zjuust Achiel! Moar ik hôore dan der verschillende soort’n geleejverd zijn!

-          Hoe wiwde zegg’n Lowie? Nen mondmaskere is toch nen mondmaskere?

-          Toch niet Achiel. ’t Schijnt dan die mondsmaskers vôor Niekolleken Demuntere twie kêern zo dikke zijn of d’andere!

-          Ja, woarom is dadde?

-          Ewew, vôor ’t lawèt os ze were ne kêer in de lach schiet! En dedie van Isauratjen zijn tsewfs mee nen extra fieltere!

-          Is dadde omdat een groene is?

-          Nieje Achiel, da woart vôor os de wirk’n an den Herbakkere zoen beginn’n da ze niet teveel gruis zoen binnenkrijg’n.

-          Ja, moar tan goa ze nog lange mee dienen masker meug’n lôop’n pejzek… Zeg, hèn ze vôor Loetsjen
           ôok nen specioale maskere?

-          Dendienen wiw gêene van ’t stad andoen, hij lôopt godgansche doag’n mee êenen van de Gantoise rond!

-          Van de Gantoise vanzeleejvne? Ist hij zô zêere achteruit an ’t goan?

-          Baneej, moar hij moet, van zijnen nieuwen boas: den VeeDeeKaa!

-          Daddis wat anders, vôor ne kêer dat hij luistert…

-          Moar weete gij wie dat de slimsten van gôw ’t stad is, Achiel?

-          Joak Lowie, da zaw Mejken zijn, de stadssecretair!

-          Nêeje Achiel, de slimsten van gôw den hôop is Kriestofken De Woale!

-          Da mêende nie! Hoe komde doarop?

-          Hij wist tsews aw joar’n damme mondmaskers gingen moet’n droag’n!

-          Joaj zekere? Hoe weete gij dadde?

-          Omdat hij aw joar’n mee zijnen briw op zijn hôofd lôopt, tan bedamp’n zijn ruit’n niet!

Marc Van Hulle

                                                   






                                                     Tussen pot en pinte 31

                                                                             Hij zit op zijn peird…

-          Hey Achiel, oe ister mee jongne?

-          Goed Lowie, goed. ‘k Voele mij volledig in forme!

-          Ha ja, hoe komt dadde?

-          Ewew, ik hè mij nen vélo gekocht!

-          Nen vélo, Achiel? Nen Harlie-steekt-hem-zewve?

-          Jip en ik hè nen vrêende slag gesleeg’n!

-          Ja, is êen mee nen batterie toch?

-          Banêet Lowie, da keu mijnen bruinen nie trekken zille!

-          Is êen van de Awdie of den Karrefoer?

-          Nêet jongne, ge zij mis. Tenandere, verkôopn ze zij doar ôok vélo’s?

-          Kweetet niet. Moar vertew mij ne kêer wukkenen slag dadde gesleeg’n hèt.

-          Ewew Lowie, ’t is een akkoaijze!

-          Een akkoaijze? Andermans mizeere wiwde zegg’n?

-          Toch niet, ’t is nen schôone vélo, goed onderhèwen en vôor een zocht prijsken!

-          Allez, ge moe gij nie schôone zijn vôor sjanse thèn hé?

-          Jaja, Lowie, lach moar. Ge zijt gij tsjaloes!

-          Joakendoen, hoe zoe kik tsjaloes moet’n zijn op iemand die nen vélo kôopt? ’t Is leen van mijn plechtige
           kommuune da’k nog ne kêer op azô wadde gezeet’n hèn.

-          Ge zoe beter een beetsje mêer mee den vélo goan rijen, da zoet a deugd doen.

-          Awawaw, Achiel, nie beginn’n gelijk Bobken hé? Ge goa mij niet verplicht’n vôor op nen vélo te kruip’n zille,
           ôok aw schiwderen ze vélopatt’n van drij meeters brêed.

-          ’t Is in alle gevaw goed vôor de kondiesse!

-          De kondiesse mijn ôore. Moar vertew ne kêer: dendienen van wie dadde dienen vélo in okkoajze gekocht hèt,
           moet dendienen nie an zijn kondiesse pejz’n?

-          Neej, hij hee gênen vélo nemêer nôdig.

-          Aw, hij is toch nie ziek of wadde?

-          Neej, moar hij rijdt nui mee iets anders!

-          Mee nen otto? Of mee nen brommere?

-          Nieje, mee een peird!

-          Mee een peird, vanzeleejvne. Da goa Bobken geiren hôorn! Dat is goed vôor de CO-twie. En os da peird ôok
           nog ne kêer schijt in de Stoassestroate, keuter hij de middenbirme mee bemest’n…

-          Lach moar, ’t is pertan nie vôor te lachen, dienen mens mee zijn peird!

-          Ha nêeje, wa schiwt er wew mee? Kennek hem toch?

-          Joag, ’t is Awbeir, de portrettentrekkere!

-          Awbeir? Woarom rijdt dienen vent nui mee een peird? Moet hij van Daniëlla toch?

-          Baneej, moar hij is riddere geword’n…

                                                                                         
                                                                                 Proficiat Albert!

                                                                       Marc Van Hulle, collega-ridder

Tussen pot en pinte 28

Notjes en tsjieps mee Niekolleken

-          Miljaar Achiel, daddis toch wew vrêed lange leen damme mekoar ne kêer gezien hèn?

-          Joat Lowie, kweetet, moar kommekik hoast ne mêer buit’n hé

-          Ha, hoe kommet? Meugde nie van ’t wijveken toch?

-          Nêeje, Lowie, mijnen bruin’n keut nie mêer trekk’n!

-          Aw zekere, hèn ze an a pensioen gezeet’n toch?

-          Bènêes, moar ‘k moe een beetjen spoar’n vôor den moment!

-          Ha, daddis wat anders. Vôor wa spoarde? Vôor een grôote reijze?

-          Nêeje vent, ‘k hè mij een brêedbeeld teevee gekocht! Azô een blafte van nen vierkanten meetre of twieje!

-          Aw zekere Achiel, woarvôorn wiwde gij azô een televieze?

-          Ewew, ik zij nen liefhebbere van spannende fielms woarin dajnze veel ruize moak’n!

-          Ha, een beetje gelijk Geejm of troons?

-          Ja, moar in de fielm woardak ik noar kijke, zijn de vrèwkes belange zô snew niet en z’hen mêestaw gelukkig
           ôok mêer klêern an!

-          Ja, wukkenen oardegen fielm is dat dan wew?

-          Ewew, Lowie, ik kijk awtijd noar den gemêenteroad op te televieze!

-          Den gemêenteroad, Achiel, wie ligt er doar nui van wakkere? Waddister doar te zien?

-          Ge zoet er nog van verschiet’n Lowie: teengenwoordig duurt da spèw vier doag’n en drij nacht’n! Zô lange
           moak’n ze van awderen tettere. Niekolleken komt oarms en bêen’n tekort vôor aw da gewewd
           een beetjen in goeie boan’n te leid’n.

-          Niekolleken? Wukken Niekolleken?

-          Ewew, Lowie, de leejdie van de rink!

-          Ha, Niekolleken De Muntere? Moar dedie is toch gêenen burgemêestere?

-          Nêes, moar ’t schiw nie veele. Z’is vôorzittere van de gemêenteroad en on Loetsjen of Powken Verstroate
           een beetjen te vele van awder ôre moak’n, tan trek ze de prieze uit.

-          Wukken prieze?

-          Awew, van die miekro’s van de televieze. Tan hôorde ze nemêer.

-          En keunde gij doar acht blijv’n noar kijk’n?

-          Bèjoak Lowie, ‘k vallekik soms wew ne kêer een hawf uurken in ’t sloap, moar dan is’t gelijk bij ‘Famielde’
           of ‘Thuis’: ge keunt sebiet weere mee. En pakkek ik mij tan een pintjen,
           en een potjen notjes of een zaksken tsjieps…

-          En ist nie schôondere op Ment TV of op Netflieks?

-          Nêet Lowie, in de gemêenteroad komdet allemow teengne: roep’n, tier’n, leugens, bedrog, weinig overêen
           komm’n, spannende stemming’n,… ’t Is echt gelijk nen fielme, moar tan zonder ’t schôon vowk.

-          Aw Achiel, wa zegde nui? Niekolleken is toch gêen oardig kind mee een sympathiek lachsken?

-          Daddis woar, moar twieje is mij tevele!

-          Oe wiwde zegg’n, Achiel?

-          Ewew Lowie, gelijk dat dedie keun’n boas speel’n, azô hek thuis aw eentjen lôop’n…

Marc Van Hulle

Tussen pot en pinte 27

Oôk Groen is een beetjen SMS

-          Ha Achiel, daddis lange leen hé?

-          An wie zegdet, Lowie. Moar ‘k het wrêed druk g’had!

-          Ge zij gij toch in pensioen?

-          Joak, moar mee de kiezinge woarek niemer te stopp’n!

-          Ha nieje?

-          Jongne, ik hè mêer of duust kilometers gewandeld in Eeklô!

-          Aw zekere, Achiel. Vôor folderkes te steek’n?

-          Nêeje, ik zochte een stroate of een steegsken woar datter gêen plakkoat van da blèw koppele Anneken en Zjanvjee stond.

-          En, gevonden?

-          Ja, in ’t Sterrestroatjen en in ’t Hondekotstroatjen, moar vôort van de reste…

-          Ik hè wew verschoot’n van den uitslag, Achiel.

-          Ik ôok Lowie. Wien hoater da verwacht?

-          Wadde? Dan de tsjeejv’n op awder toat’n zoen krijg’n of de sossen gêne zetele nemêer zoen hèn?

-          Nêeje, dat SMS van Luuksken Vandevewde de grôotste partij zoen word’n!
           En da Luuksken zewve burgemêestere zoen zijn?

-          Daddis zjuust, moar doarmee hemme weeromaw nen burgemêestere uit de medische sector!

-          Joamoar Lowie, Koentjen Loete zat toch niet in de medische sector?

-          Neej, moar Eriek Matthijs wew! Dendienen woart peirdemêestere!

-          Ah ja, ’t is zjuust!

-          Moar Achiel, ik zoe ne kêer wiw’n weet’n wat dat SMS allemow goat veranderen. Ik hè aw ’t één en ’t ander ghôord.

-          Ja Lowie, vertewd op!

-          Ewew, Marc Windèj, die weere scheep’n wordt, goat an ’t nieuw zwembad een grôot plakkoat zett’n mee “SMS” derop.

-          Ja, woarvôorne?

-          “Sportpark Mee Slierboane”!

-          Ge mêenet niet?

-          Joakendoen. En Dannie Smessoart, dien anderen scheep’n, goat in ’t Zonneheem de menu veranderen in nen
           doagelijksen SMS-menu:  Soepe mee Spinoajze, Stowverij mee Sèsse en Suikerwoafels mee Slagrôom.

-          En Luuksken Vandevewde goa nui zijn boane doen als thuisverplegere met zijnen drijkleurigen band
           boven zijn wit kielken an.

-          En woarom?

-          Ewew, daddis ôok SMS: Spêet’n Mee Sjirpe!

-          Joamoar Lowie, os ’t azô goan beginn’n tan vinnek ik datter bij Groen nog mêest vanaw SMS te vind’n is!

-          Oe wiwde zegg’n Achiel?

-          Ewew dat Iezauratjen, da vlietig dingsken van 23 joar da scheep’n goa word’n, daddis toch getopt en gedroaid SMS?

-          Oe dadde Achiel?

-          Ewew: Snewste Meisken Scheep’n

Marc Van Hulle

Tussen pot en pinte

Doarom mocht Vieksken op de Moart trekteer’n vôor zijnen trèw

-          Ha Achiel, ge stoat er sportief op!

-          Joak Lowie, ‘k zij mee mijnen Harlie-steekt-hem-zewve gekomm’n!

-          Mee wadde?

-          Mee mijnen vélo, Lowie, we moeme wew.

-          Woarom moeme mee den vélo komm’n? Is Bobken aw burgemêestere toch?

-          Nieje vent, we moeme van Kriestofken!

-          De Woale?

-          Jip!

-          Da keu nie! Dendienen héé zewve in gêen joarn nen vélo van dichte gezien en hij
           goat ons ne kêer zegg’n oe damme ons moet’n verploats’n?

-          Joaj, da stoat allemow in zijn mobielieteitsplan. Dadde en nog veel mêer!

-          Ge moakt mij nieuwsgierig, Achiel!

-          Ewew, Kriestofken wiwt overaw drempels legg’n damme moar dertig per ure ne mêer keun’n rijen!
           En hij wiwt ôok overaw vélopatt’n, en liefst zô lank en zô brêed meugelijk! En bôom’n op de Moart, en fonteintjes!
           En nen buus van de sporthalle toe an ’t kirkhof en were…

-          Ja miljaar, hij hee were veel te dichte bij Bobken gezeet’n in ’t schepenkolleejze, ’t woar te pejz’n.

-          Moar ’t is nog nie aw: der komt nen parking in de Poaterkeskirke, nen tuuneil onder de Ringboane
           an die coiffeujze mee dienen oardigen noame op Roaverschôot..

-          …Eekienoks?

-          Juust, Eekienoks. En an den Teut zoe Kristofken dan toch een rotonde wiw’n legg’n.

-          Ja, moar daddis gêene menuut te vroeg hé, want daddis doar nogal een miezeere, alle doag’n.

-          Moar ’t irgste moe nog komm’n.

-          Aw, vertewd’op Achiel.

-          Ewew, Kriestofken wiwt iets doen mee den Moart da nog nieverst ew gebeurd is. Hij wiw ne kêer speciaw doen.

-          Hoe, en hij zet overaw plakkoat’n dat hij ne kêer geweune goat doen?

-          En toch is’t woar Lowie!

-          Allee, vertellet mij. Ik keune zwijg’n gelijk een gazette.

-          Ewew, weete nog dat Vieksken Bruggeman getrewd is?

-          Joak, mee da manneken uit Thailand hé?

-          Juust. En weete ôok woar dat hij zijn resepse meug’n geejv’n heet?

-          Joak, op de Moart mee van dat oardig eet’n da zôo piekant is, dat den dôom uit a ôor’n sloat!

-          En weete woarom da Vieksken dat op de Moart meug’n doen heet?

-          Omdat hij ’t schôone gevroagd heet, zekers?

-          Nieje Lowie, omdat hij Kriestofken zijn plan goat uitvoer’n. Groaties en vôor niets!

-          Wukken plan Achiel?

-          Ewew, der komt nen Kwiekstepmoart!

-          Nen Kwiekstepmoart?

-          Ja, Kriestofken willet ôok de voetgangers gemakkelijk moak’n en hij loat Vieksken parket leggen op de Moart!
           Van Kwiekstep.

Marc Van Hulle