Berichten van 1 maart 2016 tot 31 maart 2016

Tussen Pot en Pinte (14)

Awbeir komt niet !



- Ha Achiel, da’s toch een tijken geleên hé?
- Joat jong, Lowie, moar ‘k hè in ’t buitenland gezeet’n!
- In ’t buitenland vanzeleejvne?
- Ja vent, vôor nen wurksjop!
- Nen wadde?
- Ewew, nen wurksjop. Daddis een moeilijk woord vôor een opleidinge, nen kuursuus damme zegg’n!
- Ah, doe ne kêer zô moeilijk nie hé manneken, klap ne kêer Vloams!
- Joamoar, wurksjop daddis Hollands!
- Joat, mee hoar op zekere?
- Ja lach moar, tsjaloezegoard, ‘k hè kik toch wa bijgelêerd binst die mietings van die mènnèdjers!
- Jongne, jongne, spoeld êerst ne kêer unne mond vôor dadde nog wa vertewd hé!
- Ja, Lowie, ’t spijt mij, moar in Holland klapp’n ze azô!
- Ha, gij noemt Holland ’t buitenland? Woarvôorne gingde gij noar doare?
- Ewew, ik wiwdege floor mènnèdjer word’n?
- Floor mènnèdjer? Waddis dadde? Eentjen dat de vloer schuurt?
- Nêen, ik zoe een brokke boas geword’n zijn bij Awbeir!
- Awbeir? Wukkenen Awbeir? Ik kenne moar twie Awbeirs in Eeklô!
Dendienen van den Eglantier en dienen portrettentrekkere, die tan aw dienen boel op internet zwiert.
- Ja Lowie, d’er ging nen derden Awbeir in Eeklô komm’n, moar hij komt niet!
- Wukkenen Awbeir komt er niet?
- Ewew, Awbeir Heijn!
- Awbeir Heijn? Is dat dienen winkele woar dajnze mee de potjes piendakoas noar unne kop smijt’n?
- Joat, en daddis nen Hollandse winkele die in de vroegere garajze van De Boats zoe gekomm’n zijn,
moar nui nie komt. Z’hoant nochtans beloofd!
- Ja jongne, ge weet dat nui toch wew hé. Os ge niet geklôot zijt van nen Hollandere, dan is ’t hij ’t vergeet’n.
Moar ik wiste niet datter doar nen winkele zo komm’n, ik mêendege dan de flieken noar doar zoen goan!
- De flieken, hoe komde doa nui bij?
- Ewew: die mast van Volkswoagne stoater er nog, en ik mêendege dat die VW wiwdege zegg’n:
Vanden Bossches Weuninge. En tans stond er AH, en tan woareket zekere: Antoinettes Huizekotjen!
- Ge woar mis, Lowie, den Awbeir Heijn ging doar komm’n.
- En weete ôok woarom dajnze nie komm’n, Achiel?
- Joak, miljaar. ’t Is de schuwd van ’t stad! Ze wiwdegen nie veranderen!
- Wa wiwdegen ze nie veranderen? De rijrichtinge op de rotonde?
- Ja lach moar, ze wiwdegen ’t adres nie veranderen.
’t Woar pertant nie veel moeite, moar nieje, ’t woar nie meugelijk.
- Wat moester veranderen an ’t adres?
- Ewew, zjuust de stroatnoame.
- De Keunink Awbeirstroate?
- Ja, ze moest’n er geweune moar de Keuning Awbeir Heijnstroate van moak’n. Is da nui zô lastig?

Marc Van Hulle