Berichten van 1 maart 2018 tot 31 maart 2018

Tussen pot en pinte 25

Nen anderen noame vôor de zwemkom

-  Ha Achiel, hoe ist?

-  Goed Lowie, ‘k awtijd moar beejzig!

-  Ja ‘k ziet gelijk: g’hè weeromaw a bott’n an. Ge zij toch weere gêen bosken vôor klène kientjes aan ’t plant’n hé?

-  Nêek Lowie, moar ‘k zij wew weere an ’t sputten!

-  Ja, in de lochtink?

-  Nêeje, an de sporthalle en den nieuwen zwemkom!

-  Wa moeter doar gesput word’n Achiel?

-  Ewew, op de parking zijn ze beejzig mee archeeoloogiese opgroaving’n.

-  Wa zijn dadde?

-  Da gebeurt deur mannekes dien amow noar den unief geweest zijn en dien op zoek zijn noar èwen bucht die in de grond zit.

-  Daddis tan een beetjen gelijk dan Romano en Georsken vroeger deejn?

-  Romano?

-  Ja Romano Tondat. Oster in Eeklô ieveranst nen put van mêer of nen meter diepe gegroav’n woart, deej Romano den
boel stille legg’n, sprongt hij in dienen put vôor te kijk’n oster gêen stiksken van Kejzer Koarele inlag.

-  En Georsken?

-  Ewew, Georsken Spittoaw. Os den dienen ieveranst zijn schuppe boven hoawdege, vond hij garantie vier obuus’n
en nen dôojen Duitsere.

-  Nêeje Lowie, an de sporthalle zijnt andere dewvers.

-  En doen ze awder weirk een beetjen goed?

-  Joas jongne, niet te gelôov’n wat dajnze doar allemolle noar boov’n hoaw’n…

-  Is zôo erg Achiel?

-  Joat, want ze goan tsews den noame van den nieuwen zwemkom moet’n veranderen!

-  Hee den nieuwen zwemkom aw nen noame?

-  Joaj: het Verbauwenbad, noar Eirman, Karientjen en Paskalleken, ge weet wew dedie dien zô geirne in da
kloorwoatere ligg’n spertelen.

-  ’t Is in alle gevaw betere gekooz’n dan bij ’t plèn van de feecee!

-  Woarom toch?

-  Ewew, dat is het Tsjeete De Vloaminck-stadion, want Tsjeete woar nen vrêenden goeien voetbawdere…

-  Ge keunt gelijk hèn. Moar dien noame van den zwemkom goat ôok veranderen.

-  Ja woarom Achiel?

-  Ewew, deur aw dienen brol dien ze bij die archeeoloogiese opgroaving’n gevond’n hèn!

-  Wat zatter doar wew in de grond toch?

-  Ewe trewawbums, foto’s en fielmkes vôor in de kodaks…
Blijkboar hènder doar vroegere vrêend veel portrettentrekkers geweunt.
Doarom goan ze dien noame veranderen!

-  Ja en wa goat word’n Achiel?

-  Het Vergauwe-bad, gelijk bij Dzjieno.

Marc Van Hulle

Tussen pot en pinte (24)

’t Is de schuwd van Annie!

-  Jep Achiel, hoe is’t?

-  Goed Lowie, goed. Ik hè zoaterdag iets nieuws binnengespeeld!

-  Ja, hé Marie den kookboek van Pascalleken Noassens gekocht toch?

-  Nieje vent, ik zij noar den Thaj geweest!

-  Noar den Thaj? Da kennek niet. De Sjienees in de Stoassestroate, da wew, moar den Thaj?

-  Ja Lowie, in den Boeloare ister nen Thaj.
En die keirele trekteerdege zoaterdag mee hapkes vôor da beeldeken van Jeannien.

-  Wukken beeldeken?

-  Ewew, van da wijveken in posiesse.

-  Is Jeannien in posiesse? Hee ze nui nog nie gelêerd mee heuren Pow?

-  Nêen Lowie, Jeannien heeft een beeldeken gemoakt van een wijveken in posiesse.
En da beeldeken stoa nui op den hoek van den Boeloare en ’t Snuifmeuleken.

-  Ist een Thajs wijveken toch?

-  Nêet, een Vloams, moar dienen Thaj van doarrechtovere wiwdege ne kêer trekteern.

-  Ha, nui verstoaket. En da beeldeken: is da nui ôok een wijveken mee blôote tetjes?

-  Mee blôote tetjes Lowie? Hoe wiwde zegg’n?

-  Ewew, os Jeannien een beeldeken moakt, ist awtijd mee borstjes.
Kijk moar ne kêer noar Keizerken Koarele op de muur van ’t Vetjen op de Moart.
Of noar Lotsjen, os da gêen schôone stoanderkes zijn…

-  Joamoar, Jeannien moakt ôok beeldekes zonder tetjes hôor.
Kijk moar noar da van Ivonne op ’t Djenuiverplèn.

-  Ja Achiel, da zoeter nog an gemankeerd hèn dat ze de tetjes van Vonne doarbij moaktege…

-  Ge keunt gelijk hèn, Lowie.

-  Moar Achiel, vertew mij ne kêer woarom dat da beeldeken van da wijveken in posiesse nui doar stoat?

-  Ewew, ’t stad vond dat da beeldeken nie schôone ne mêer stond in de Stoassestroate.
Doar stondet rechtover den Sjienees, nui stoat rechtover den Thaj.

-  En woarom stondet doar nie schôone nemêer Achiel?

-  Ewew, Lowie, dat is de schuwd van Annie!

-  Van wukken Annie?

-  De kwoiffeujse! Annie Vandewalle!

-  Ja, wat heef ze zij gedoan toch?

-  Ewew, Lowie. Da beeldeken van da wijveken in posiesse stond doar zôo schôone op den trottoir, moedertsjiep allêene.
En tan is Annie doar gekomm’n mee heuren salon.

-          Ja, en tan?

-  Deur Annie is da wijveken in posiesse doar weggelôop’n.
Mee aw heur hoardrôogers heeft Annie veel eletriek nôdig,
dus hèn ze doar twie eletriekkass’n an heur deure moet’n zett’n, neefest da beeldeken.
Annie krijgt ôok veel vowk over de vloer, dus hèn ze ook nen parkeermetere,
een vuilbaksken en wa velorekk’n gezet, allemoale neefest da wijveken in posiesse.
En bovenandien kwamt Annie zewve ôok af en toe een klapken doen…

-  Ja Achiel ‘k verstoat, ge zoe vôor mindere verhuiz’n noar den Boeloare…

Marc Van Hulle