Categorie: Tussen pot en pinte

Tussen pot en pinte (24)

’t Is de schuwd van Annie!

-  Jep Achiel, hoe is’t?

-  Goed Lowie, goed. Ik hè zoaterdag iets nieuws binnengespeeld!

-  Ja, hé Marie den kookboek van Pascalleken Noassens gekocht toch?

-  Nieje vent, ik zij noar den Thaj geweest!

-  Noar den Thaj? Da kennek niet. De Sjienees in de Stoassestroate, da wew, moar den Thaj?

-  Ja Lowie, in den Boeloare ister nen Thaj.
En die keirele trekteerdege zoaterdag mee hapkes vôor da beeldeken van Jeannien.

-  Wukken beeldeken?

-  Ewew, van da wijveken in posiesse.

-  Is Jeannien in posiesse? Hee ze nui nog nie gelêerd mee heuren Pow?

-  Nêen Lowie, Jeannien heeft een beeldeken gemoakt van een wijveken in posiesse.
En da beeldeken stoa nui op den hoek van den Boeloare en ’t Snuifmeuleken.

-  Ist een Thajs wijveken toch?

-  Nêet, een Vloams, moar dienen Thaj van doarrechtovere wiwdege ne kêer trekteern.

-  Ha, nui verstoaket. En da beeldeken: is da nui ôok een wijveken mee blôote tetjes?

-  Mee blôote tetjes Lowie? Hoe wiwde zegg’n?

-  Ewew, os Jeannien een beeldeken moakt, ist awtijd mee borstjes.
Kijk moar ne kêer noar Keizerken Koarele op de muur van ’t Vetjen op de Moart.
Of noar Lotsjen, os da gêen schôone stoanderkes zijn…

-  Joamoar, Jeannien moakt ôok beeldekes zonder tetjes hôor.
Kijk moar noar da van Ivonne op ’t Djenuiverplèn.

-  Ja Achiel, da zoeter nog an gemankeerd hèn dat ze de tetjes van Vonne doarbij moaktege…

-  Ge keunt gelijk hèn, Lowie.

-  Moar Achiel, vertew mij ne kêer woarom dat da beeldeken van da wijveken in posiesse nui doar stoat?

-  Ewew, ’t stad vond dat da beeldeken nie schôone ne mêer stond in de Stoassestroate.
Doar stondet rechtover den Sjienees, nui stoat rechtover den Thaj.

-  En woarom stondet doar nie schôone nemêer Achiel?

-  Ewew, Lowie, dat is de schuwd van Annie!

-  Van wukken Annie?

-  De kwoiffeujse! Annie Vandewalle!

-  Ja, wat heef ze zij gedoan toch?

-  Ewew, Lowie. Da beeldeken van da wijveken in posiesse stond doar zôo schôone op den trottoir, moedertsjiep allêene.
En tan is Annie doar gekomm’n mee heuren salon.

-          Ja, en tan?

-  Deur Annie is da wijveken in posiesse doar weggelôop’n.
Mee aw heur hoardrôogers heeft Annie veel eletriek nôdig,
dus hèn ze doar twie eletriekkass’n an heur deure moet’n zett’n, neefest da beeldeken.
Annie krijgt ôok veel vowk over de vloer, dus hèn ze ook nen parkeermetere,
een vuilbaksken en wa velorekk’n gezet, allemoale neefest da wijveken in posiesse.
En bovenandien kwamt Annie zewve ôok af en toe een klapken doen…

-  Ja Achiel ‘k verstoat, ge zoe vôor mindere verhuiz’n noar den Boeloare…

Marc Van Hulle

Tussen pot en pinte (23)

Sputten mee den burgemêestre

-  Ha Achiel, ’t is weer een teijken geleen hé?

-  Joat Lowie, moar ‘k hè een pôoze ziekskes geweest. Moar nui zij ‘k er deure en weere duust man steirk!

-  Ja, ge ziet er allesinds nie smêerkes nemêer uit!

-  Goeje dokteurs, hé vent, bij Awma. En z’hèn mij gezejd da’k veele moet’n beweeg’n.
‘k Meuge nie gôole doag’n in mijne zeetele noar AVS of Tempteejsjen Aailand zitten kijken.
‘k Moe buit’n lôop’n, zegt den dokteur!

-  Ewew, ge keunt toch ne kêer goan wandelen in ’t Lêen of in ’t Park? Of tsewfs in de Lembeekse Bossen?

-  Joak, moar ik hè een andere beejzigheid gevond’n.

-  Ja, wat dadde? Zitter Ierma vôor wat tussen?

-  Nêes, Lowie, ge moe weere gêen slechte gedacht’n krijg’n!
‘k Zij kik mijn ewde zille, en Irma zeekers…

-  Ewew, waddis die beejzigheid tons?

-  Ik goa goan sputten!

-  Sputten? Gelijk in de lochtink? Mee een spoa?

-  Ja Lowie, ge zit er boenk op!

-  ‘k Wiste kik nie dadde gij nog nen lochtink hoat in ’t Kokkerstroatjen! Wa kwêekte doar tan?
Toat’n? Of tomatt’n? Of andzjuun? Of pissebeuntjes?

-  Nêeje Lowie, ik hè gêene lochtink nemêer. ‘k Hè doar van Irma een terras moet’n van moak’n.

-  Moar woar sputte gij tan wew, Achiel?

-  In de Pokmoere, op ’t ende van de Krôonstroate!

-  Ligt er doar nen lochtink?

-  Nêet Lowie, doar wordt er nen bos geplant!

-  Nen bos, vlakbij ’t Lêen? Daddis gelijk nen vijver anlegg’n neefest de zêe hé?

-  Dat is nen speciawn bos, Lowie!

-  Ja, wat ister speciaw an een bende jonge bôomkes op een rotte?

-  Dat is nen geboortenbos!

-  Waddisdadde?

-  Ewew, vôor ieder kientjen da sinds 2013 geboor’n ist in Eeklô, meugt er doar een bôomken geplant
word’n deur ’t kientjen zewve, of deur voader of moedere, of deur peetjen en meetjen.

-  Ja, daddis ôok wew schôone toch!

-  Joat Lowie, moar ’t is doar toch wew een misverstandjen geweest!

-  Ja, waddister gebeurt toch?

-  Ewew, de burgemêestere is doar toegestuikt met nen kamion bôomkes:
moar liefst 2.179 bôomkes hoat hij mee!

-  Aw zekere! Wiw da zeggen dat hij de loaste zes joar 2.179 kêern voadre is geword’n?
‘k Wiste dat nen rappen woart, moar da zoede hem ôok toch nie toegegeejv’n hèn hé?
Ja, Loetsjen! ‘k Wiste da zijn zusters rappe woar’n, moar 2.179 bleiters op zes joar…

-  Ja en hij stond grêed mee zijn schuppe vôor aw die bôomkes te plant’n
toe datter hem iemand gezejd heet dat hij mis woart! Hij hoat misverstoan!

-  Hoedadde?

-  Hij wist niet dat owver de kientjes van de loaste zes joar gingt,
hij mêendege dat hij vôor aw zijn kiezers een bôomken mocht plant’n…

Marc Van Hulle

Tussen pot en pinte 22

Burgemêester Dzjieno

-          Miljaar Achiel, daddis toch wew lange geleen damme mekoar nog ne kêer gezien hèn, hé?

-          Ja Lowie, zeg wew, moar ik weete nie woar da mijn hôofd êerst stoat!

-          Aw zekere, ge zij gij toch in pensioen?

-          Joak Lowie, moar ge kent dadde hé? Wie hée ter awtijd minst tijd? De gepensioneerde toch wew hé?

-          Daddis zjuust, Achiel. Moar zeg nekêer: woar zijde gij mee beejzig?

-          Mee twie ding’n in êene kêer. Ge weet hoe dajnze da noem’n hé? Muultietask’n.

-          Jawadde, ge begint aw moeilijken klap te verkôop’n. Moar zeg ne kêer, ge moak mij nieuwsgierig.

-          Ewew, vôor mijn êerste project hè ‘k een beetjen afgekeek’n van Kriestofken De Woale mee zijnen WIEKIE-bon.

-          Nen wadde? WIEKIE-bon?

-          Voilà Lowie, ik hè zjuust tzewfste gereageerd: Winkelen in Eeklô, Kôop’n in Eeklô.
Daddis toch twie kêer’n tzewfste? Os ge hier winkelt, dan kôopte hier toch ôok?

-          Daddis zjuust, Achiel.

-          Ewew, doarom ister nui een stirk verbeterde versie van Kriestofken zijnen kadobon: den KEZIEPIO-bon!

-          KEZIEPIO vanzeleejv’n?

-          Ja, en doarmee moakek iederêen content: de winkeliers, de caféboajz’n, Bobken zijnen anhang en Loetsjen
mee zijn fusiegedachten.

-          Ja, moar da moede mij ne kêer explikeer’n zille.

-          Ewew, het êerste dêew van KEZIEPIO stoat vôor Kôop’n en Zuip’n in Eeklô, dus daddis goed
vôor de winkeliers en vôor de caféboajz’n.

-          En wa wiwt PIO tan zegg’n?

-          Doarmee moakek groen Bobken en den burgemêestere wrêed gelukkig. PIO stoat vôor Parkeer’n in Oaigem!
Doarmee stoander gêen auto’s op de Moart – goed vôor Bobken – en wordt er geparkeerd bij de
nieuwe Eeklônoars achter de fusie: in Oaigem!
En doarmee loat’n we Loetsjen nog nen loatste kêer content zijn.

-          Hoe wiwde zegg’n: nen loatste kêer, Achiel?

-          Ewew, noaste joar ist kiezinge en tan ist Loetsjen an zijnen rekkere!

-          Ja, wie zegter dadde? Wie goat er tan burgemêester worden? Kriestofken? Of da blondjen van den N-VA?
Of dienen juuge van SMS?

-          Nêen Lowie: Dzjieno wordt burgemêestere!

-          Dzjieno? Wukkenen Dzjieno?

-          Ewew, den portrettentrekkere uit de Meulestroate!

-          Vergaawe?

-          Ja, dendienen! En hij wiwt da’k ik zijn campagne voerek! We zijme aw goe beejzig.
Op Feejsboek ist hij aw moand’n beejzig dat hij burgemêestere wiw word’n en an de reste wordt ôok gewirkt!

-          De reste? Wa wiwde zegg’n?

-          Vôor de jeugd in te pakk’n, ister mee Steefanietjen een wrêed jong assistentjen bij gekom’n.
Ondertuss’n doet hij zôgezejd een hulpactie voor Kuuba. Mijn ôore: aw die valiez’n mee kinderklêerkes,
speelgoed en wc-papier stoan nog in zijnen winkel in de Meulestroate, binst dat hij op stage ist noar gindere!

-          Noar woare?

-          Ewew, noar Kuuba. Hij is doar de kneep’n van ’t vak goan leer’n bij Fidel Castro zijn broere!

-          Moar vent toch Achiel, ik hè nogal een beetjen kompasje mee die Kuuboanen!

-          Ja woarom Lowie?

-          Ewew, êerst hèn ze af te rekenen gekreeg’n mee Irma.
En nui passeert er iets veel slechtere: orkoan Dzjieno!

Marc Van Hulle

-          Ah Achiel, wa zitte gij doar te leejz'n? Weer een vuil boeksken van bij Strobbes?
-          Moar nêen Lowie, ik zij den ProMeet an't leejz'n.
-          De wadde?
-          Ewew, den ProMeet. Da boeksken van Steejv'n De Dappere en Tonnie Soens.
-          Wukken boeksken? Ken kenne kik da niet!
-          Den ProMeet, daddis een boeksken dat iedere moand bij de slachtere, den tantiest en
de coiffeujse goa ligg'n, mee allêene moar positief nieuws over 't Meetjesland!
-          Positief mijn ôore! Oster allêene moar goe nieuws goat instoan, zallet een vrêend dun boeksken zijn, zille.
-          Lowie, ge meug zôo negatief nie zijn. De redakse van den ProMeet zawt heur beste doen
vôor schôone artiekels en foto's.
-          De redakse? Wukken bende tôopegeroapte is dat dan wew?
-          Ja jongne Lowie, den Steejv'n en den Tonnie hèn awder beste gedoan vôor nen hôop
schôon vowk tôope te krijg'n! Te beginn'n mee Marc Van Hulle.
-          Marc Van Hulle? Is dat den dienen van de klinieke? Gij noemt da schôon vowk? 'k Pejze
dan den Steejv'n en den Tonnie nen goeien briw nôodig hèn...
-          Joamoar, 't verbeetert allêene moar. Vôor d'artiekels owver meziek hèn ze Geertjen Foas
an den hoak gesleeg'n. En Gaia Rysseloare en Ludo Gôossens goan iedere kêer iets owver
den natuur schrijv'n.
-          Da Gaiatjen kennek niet, moar dienen Ludo, daddis toch diene keirele die vôortien doag'n
plat op zijnen buik in't ges ligt vôor êen blende vinke te keun'n trekk"n hé?
-          Joat! En wa pejsde van Gie Bonne van Woarschôot?
-          Is dat dienen metsere van den Eeclôonoare van vroegere?
-          Wukkenen metsere Lowie, hoe komde doar nui bij?
-          Ewew, den dienen schreeft toch alle week'n dat hij weere nen stêen verlejd hoat?
-          Ja jongne, gij zijt ôok wew nen wietekoo. Moar kende Sofietjen Schôonackers, nog
eentjen da vôor de ProMeet goa schrijv'n.
-          Dedie kennek, Achiel, daddis wat dajnze een schôone okkoajze noem'n!
-          Okkoajze? Oe wiwde zegg'n?
-          Ewew, Achiel, daddis toch wew da jongsken van de Kringwinkele?
-          Joat, daddis zjuust. En kende Marliesken Neirink ôok?
-          Nêenek Achiel, moar 't klinkt wew goed.
-          En 't zie ter goed uit ôok, zille! Daddis een dochtere van die zoake in den Boeloare
mee dienen schôonen noame.
-          Wukkenen schôonen noame? Den Arguus toch nie hé? Of de Witte Zwoane?
-          Daddis nui bijkans 't zewfste Lowie. Ik hèt op 'Mooi', daddis toch nen schôonen noame?
-          Ja jongne Achiel, ge begint ôok aw gelijk die bende van den ProMeet:
awtijd moar positief positief.
-          Ewew, positief daddis toch leutig? En weete wa datter ôok zôo leutig is?
Da zijn die redaksevergoaring'n van den ProMeet.
-          Woarom zijn dedie leutig?
-          Lowie, doar wordt er nogaw gezoop'n! Niet te doen. Den êenen dzjientoniek achter
den andere. Of sampampele mee vliendersirope! Zuipen!
-          Ja Achiel, da goat ôok nie lange duur'n tan? Woarom wordt er doar zôovele gedronk'n?
-          Ewew Lowie, daddis verplicht van den Steejv'n en den Tonnie! Iederêen moet tewkens
zôo zat of een kanon noar huis goan.
-          Woarvôorn is da goed?
-          Daddis simpele, Lowie: os de poliesse awder teeng'n hewt, en ze moet'n in't zaksken
bloajz'n, goat allêene moar positief zijn!

Marc Van Hulle

Tussen pot en pinte (18)

Klostrofobies

- Ha Achiel, hoe is’t jongne?
- Nie zôo goed, Lowie, nie zôo goed…
- Aw, zijde a griepspêete vergeet’n toch? Ge ziet er toch moar een beetjen smêerkes uit, zille.
- Nieje Lowie, ‘k zij koat!
- Op wiene? Toch nie op a vrèwken hé?
- Nêen, op de polletiekers!
- Ha, moar den hewft van Ee-ke-lô is koat op de polletiekers, daddis gêen nieuws zille.
- Joamoar, z’hèn mij verweet’n op de gemêenteroad en doar keunek nie teengne!
- Waddister wèw vertewd toch?
Toch weere nie owver da briefken van tien euro mee den burgemêestere zijn totsjen op?
- Nieje, ze lachen mee mijn huizeken!
- Hoedadde? Ge weunt gij toch schôone in die nieuwe verkoavelinge in de Zuidmoerstroate?
- Da pejsdegek ôok, moar van die polletiekers zoe’k doar moet’n nen uniforme droag’n!
- Nen uniforme, Achiel? Gelijk in ’t legere?
- Ja, want vowgens die polletiekers weunekik in een kazeirne!
- Wie zegter dadde?
- Ewew, van die keirels, die zewve in nen viela in de witte wijk of op de roete weun’n,
dien een appartement of viere in ’t buitenland hèn of die zewve al ewvendertig flatjes
van tfôortig vierkante meters verhuur’n of verkôop’n.
- Daddis ter op hé?
- En ‘k goa ôok nen numero in mijnen oarme moeten loat’n tatoeweern, gelijk in de kamp’n van vroegere.
- Ja woarom?
- Ewew, Lowie, omda’k vowgens die polletiekers in een getto weunek!
Mijn Irma en ik weun’n in een getto!
- Jawadde, ge zoet er inderdoat nie goe van word’n!
- Zjuust doarom: noaste weeke goame noar Awma vôor een onderzoek, Irma en ikke!
- Woarvôorne, ge luistert toch nie noar die prietproat?
- Joakendoen, ’t schijnt damme klostrofobies goan word’n omme doar blijv’n weun’n!
- Klostrofobies, waddis dadde Achiel?
- Ewew, daddis os ge vried veel schrik hèt van wènig ploatse.
Dad heeft er ôok êen’n gezejd op de gemêenteroad!
- Da zijn doar nog aw keirels hé?
- Joat, en weete wat nog ’t eirgste vanaw is?
- Ister nog iets eirger, Achiel?
- Joat, ik moe nui godganse doag’n wurkels eet’n!
- Wurkels? Mankeerde wat an a ôog’n toch?
- Nêek Lowie, moar da komt ervan os ge in konijnekoot’n weunt hé…

Marc Van Hulle

Wie de vorige afleveringen van 'Tussen pot en pinte' nog eens wil
lezen kan deze gemakkelijk vinden in de linkse kolom
onder 'Categorieën' en op Tussen pot en pinte klikken.

Tussen pot en pinte (17)

Op bezoek bij Awma

- Ha Achiel, hoe ister mee?
- Goed Lowie, goed. Moar ‘k hè wew een beetsjen sjanse g’had zille.
- Ja, wa schiwtere? Ge zijt toch nie averre gelôop’n deur nen Pokeemonzoekere?
- Nen wadde?
- Ewew, azô van die jonge gastjes die mee awderen teelefon op stroate lôop’n zoek’n noar
van die oardege beestjes diede zjuust allêene moar op kompjoetere keunt zien.
- Nêeje Lowie, ’t woart dadde niet.
- Wa dan wew?
- Ik zij op bezoek geweest bij Awma!
- Bij Awma? Wien is dadde? Een èw lief? Of een achternichtjen da’k nog nie kenne?
- Nêeje, Awma, ge weet wew: de klinieke!
- Ah, ’t Heilig Herte van vroegere! Ge zijt toch nie ziek, Achiel?
- Nêenek Lowie, ‘k zij op bezoek geweest.
- Bij wiene, kennek hem of heur?
- Ge kent hem natuurlijk wew: Awbeir.
Ge weet wew: diene keirele die godganse doag’n mee zijnen vélo en zijnen kodak rondsjêest
en aw dat hij teengnkomt op zijnen blog zwiert?
- Ah, dienen Awbeir. Woart hij ziek toch?
- Joai, moar kweete nie zjuust wat datter mankeerdege an hem.
- Hoe wiste tan dat hij in Awma lag?
- ‘k Hoat gezien op zijnen Feejsboek, hij hoat een fotootjen van hemzewve in een
sloapkleedjen derop gezet.
‘k Pejsdege: dat is nog nen vriendelijken keirele, ‘k goa hem ne kêer een bezoekske breng’n.
- En wa zejt hé os ge binnen kwamt?
- Niets Lowie, ‘k woare miljaar te loate!
- Hoe te loate? Hij is ’t toch nie an zijnen rekkere?
- Neej, hij woart aw noar huis. Doarom hè ‘k nogaw een beetjen sjanse g’had!
- Hoe wiwde zegg’n sjanse?
- Ewew, ‘k kwamme op zijn koamere op ’t derde verdiep. Zijnen gebuur lag nog in zijn bedde,
moar die keirele die in Awbeir zijn bedde gelejd woart, zat op de wc!
- Ja, da keu gebeur’n hé, Achiel. Ge moe gij toch ôok af en toe ne kêer kakk’n toch?
- Joak, moar da manneken woart an ’t roepen. En ik hôordege uit dienen wc awtijd
moar geluiden komm’n, die goe genoeg kendege…
- Ja en tan?
- Ewew, omdat da manneken bleef roep’n en omdat er gêen infermjeirken te zien woart,
hè ‘k ik die deure opengetrokk’n.
- Ja en wa gebeurdeger tan?
- Ewew, hij woar wel aw noar huis, moar op en neefest dienen wc-pot zagge ‘k ik… aw beir!

Tussen pot en pinte (16)

Van de grond goan

- Ha Achiel, ge ziet er zôo content uit?
Ge goa mij toch nie zegg’n dadde de Lotto gewonn’n hèt hé?
- Nêenek jongne Lowie, ’t is iets veel beters!
- Wadde, hedde ‘Win for Laaif’ gewonn’n toch?
- Banêek Lowie, ‘k meuge ne kêer!
- Hoe ge meug ne kêer? Wa meugde ne kêer?
- Ewew, ‘k meuge ne kêer van de grond goan mee mijn Irma!
- Joamoar Achiel, dienen vuilen proat, doar zijn de mejns’n nie mee gediend zille!
- Da meug toch geweet’n zijn damme ne kêer van de grond goan?
- Dakket nie mêer moet’n hôor’n Achiel!
- Allé, waddis ter doar nui erg an? Irma en ik in ons mande, daddis toch leutig?
- Achiel, ge moak mij koleirig hé vent.
Ge moet owver dienen vuilen dêefele nemêer klapp’n teeng’n mij.
- Daddis pertant spijtig, want Irma en ik hoan geiren g’had dadder bij zoe geweest zijn.
- Woarbij? Binst dadde goawdere… ‘k en meuget nie gedrôomd hèn!
‘k Zoe nog veel lievere vôortien doag’n beir voer’n…
- Joamoar Lowie, ge zoe nie allêene zijn diet zoen zien zille!
’t Goat doar mêer of tienduust man noar komm’n kijk’n os Irma en ik van de grond goan!
- Tienduust man? Ge doe toch nie mee in nen pornofielme hé? Gij en Irma?
Op awderen èwerdom? Hoeveel blèwe pillekes goade gij doarvôorn moet’n slikk’n?
- Allé Lowie, woar klapte gij nui owvere? Nen pornofielme?
‘k Moe wèw zegg’n dan der doar veel rondingen goan te zien zijn, daddis woar.
- Ziedet! In wukkenen hoerenboel zijde gij terechte gekomm’n?
Woarvôorne doede gawder dadde? Vôor ’t gewd?
- Vôor ’t gewd? E moar Lowie, we moeme der nog vôorn betoawn!
- Nog betere! Moar ja, da verstoak nui wel een beetjen,
want vôor a en Irma beejzig te zien,
doar zoe’k ôok nie te veel spêekers uitlegg’n zille…
- Joamoar, aw da vowk komt vôor niets kijk’n noar ons hé.
’t Is allêene moar spijtig dajnze ons hôogtepunt nie goan keun’n zien of hôor’n.
- Ja hallo, Achiel, daddis moar best ôok zekers?
En wannêer goaje van de grond mee Irma vôor aw da vowk?
- Ewew, ’t zaw den 30sten of den 31sten julie zijn.
’t Is te zien wukken weer dat is!
- Hoe? Wukken weer? Marsjeeret nie bij a ost an ’t reengnen is, toch?
- Bèjoat, moar tan goan de ballons niet op…

Marc Van Hulle

Tussen Pot en Pinte (15)


Vitaw!

- Aah Achiel, daddis ôok wew lange leen da’k a nog ne kêer gezien hè!
- Ja Lowie, ‘k zij aw die moand’n op afzonderinge geweest!
- Op afzonderinge? Ge wordt toch gêen Oarm Kloarken hé?
- Moar benêek Lowie, ik hè mee geweest mee Vitaw!
- Vitaw, wukkenen Vitaw?
- Ewew, de rechterand van Wielmots!
- Ha, Borkelmans! Van de voetbaw? Van Karlatjen, da kwoiffeujzeken uit de Meulestroate?
- Zjuust, dendienen. Ik zij doar nen vrêende fan van, ik vinde dat azô een simpatiek manneken.
Aw van ost hé bij Club speeldege. Dan heet hij twie mindere peerjoden ghad,
bij Gent en bij Circle, moar nui stoat hij weere an den top!
- ’t Is doarmee dadder zôo sportief opstoat? Mee een rôod truijken en mee sjmienk op a tootjen!
- Ha ja hé, ‘k zij kik overaw meegeweest in Frankrijk mee Vitaw hé.
Noar Liejon, noar Bordo, noar Toeloeze, noar Nies, en noar Rijsele…
- En tan woaret gedoan zekere?
- Hè joat hé, die schoapenkwêekers van Weejls woaren te goed vôor ons.
- En nui krijgt Wielmots op zijn dôoze?
- Joaj, moar Vitaw geeft doar nie omme zille.
- Hoe, woarom niet? Wielmots woar toch zijnen moat?
- Joat Lowie, moar Vitaw kijkt verdere hé. Ge moet da verstoan.
In da weireldsjen ist ewk zijn schelle!
- Wa wiwde nui zegg’n?
- Ewew, ge meuget niet vôort vertew’n hé, moar Vitaw goa Wielmots opvowgen als bondscoach!
- Joaj!? Vitawken? Boas van de Duuvels? Ja miljaar! Hoe is da gekomm’n?
- Deur zijnen manaazjer!
- Wukkenen manaazjer Achiel? Gij toch niet?
- Nêeje, aw zoek da wew wiw’n zijn, hé. En ‘k zoe kik da goe doen, ôok pejzek.
- Joamoar, wie ister zijnen manaazjer dan wew?
- Ewew, Vitawken hee gedoan gelijk Wielmots!
- Ist hij Frans beginnen klapp’n en wit hemdekes droag’n?
- Nêeje, hij hee zijn madam ingeschoakeld!
- Wiene? Karlatjen? Zijn kwoiffeujzeken uit de Meulestroate?
- Zjuust, Lowie. Karlatjen hee weesten klapp’n mee den voetbawbond,
z’hee doar binst wa miezanplietjes gelejd en voilà, Vitawken is de grôoten man!
- Jawadde. En nui goat hij de speelders selekteern vôor de nationoale ploeg?
- ’t Is te zegg’n, hij nie allêene!
- Hoe, è Wielmots moe toch zijn schuppe afkuis’n?
- Joaj, moar Karlatjen wiw nen vinger in de pap!
- Wa weet Karlatjen nui van voetbaw, Achiel?
- ’t goa hier nie mêer owver voetbaw, Lowie, moar owver hoar!
- Hoar? Oe wiwde zegg’n?
- Ewew, Karlatjen wiwt da Vitaw de speelders kiest vôor awder hoar!
Feelajnie, Najngolan, Wietsel en diene klènen Loekakoe meugen op awder twie ôorn sloapn:
dedie goander awtijd bij zijn.
- Ja, allé, moar tan hè kik toch kompasse zille
- Kompasse, mee wiene
- Ewew mee Sieman…

Marc Van Hulle

Tussen Pot en Pinte (13)

De geheime briefkes van Pow Walloart

- Ja Achiel, ge stoat er were zo snew op! Goa were goan tert’n toch?
- Bènêek Lowie, ‘t is vôor noar ‘t scholle te goan!
- Oe noar ’t scholle? Ge zij miljaar ewventachentig joar en ge wiw nog noar ’t scholle goan. Leg mij da ne keer uit!
- Ewew, ik hè een invietoasje g’had van Annieksken vôor noar die êerstestêenlegginge van de nieuwe scholle van ’t colleejze te goan.
- Annieksken, wukken Annieksken?
- Ewew, Lowie, da jongsken da nog burgemêestre van Sente geweest is, moar nui moederowverste geword’n is van ’t colleejze en ten dôorne!
- Ah, Anniekske Willems! En van dedie meugde gij noar da feestjen goan?
- Joak jongne en ’t schijnt datter doar nen mieniestere goa zijn, ôok!
- Toch Schèwvliege nie hé? Want dedie zien ze niet te geirne gelôovek?
- Nieje Lowie, ’t is Hieldeken Kreeviets die een woordjen komt zegg’n. ’t Zaw vrêed spannend zijn, pejzek.
- Spannend, Achiel, waddister nui spannend an een êerstestêenlegginge, en tan nog in een èwe nonnekensscholle?
- Joamoar Lowie, ze goan een geheim verklapp’n op die êerstestêenlegginge!
- Een geheim? Wukken geheim? Dander vroeger in Ten Dôorne allêene moar meskes, en in ’t colleejze allêene moar jongens zatt’n?
- Nieje Lowie, ze goan verklapp’n wat datter in die twie flaskes gezeet’n heet!
- Wukken flaskes? Ister nog een flasse djenuivre van de superior gevond’n toch?
- Z’hen in de kapelle van ’t colleejze nen èwen stêen uit de muur ghoawd en achter die stêen…
- …zatter nog nen gôown hoop èwe stêen’n zekers?
- Nieje Lowie, achter dien stêen woaster een nisken mee doarin twie èwe flaskes. En in die flaskes zatt’n er briefkes!
- Ja miljaar, briefkes! Mee afloat’n? Of een bestellingsken vôor bij den Beir?
Of nen liefdesbrief van nen paster van ’t colleejze noar een nonneken van Ten Dôorne?...
- Ze goan ’t moar zegg’n bij die êerstestêenlegginge, moar khè aw ne kêer op ’t gemak en in ’t geniep geluisterd bij Pow Walloart.
- Pow Walloart? Is da dendien’n van de Klappere mee aw diene goeien wijn op zijn ipperste?
Wa weet dendien’n van geheime briefkes in een kapelle?
Da zawt hij toch nie bij Piet De Boats gelêerd hen ost hij bij de Klappere weirktege?
- Ewew, Pow Walloart is nui de woordvoerdere van ’t colleejze en ten Dôorne.
En hij heef mij, achter drij gloajz’n Sjattoo Migreine, vertewd wat datter op die briefkes stoat!
- Vertellet Achiel, ke keune mij hoast ne mêer hèwen van kurjeuzeteit!
- Ewew, Lowie, ozzek Walloart goe verstoan hen, want hij weunt aw een pôoze in Sente en doar klapp’n ze nie awtijd eejven goed,
dan stond er op dat êerste briefken het adres woar da Serafien zijn pierballekes kocht!
- Serafien, wien is da nui weere?
- Weete gij da nie Lowie? Serafien woart den portier van ’t colleejze bij wien dadde pierballekes moest goan kôop’n.
- En wa stonter op dad ander briefken?
- Doarop stonter wat dadde an Serafien zijn deure moest hang’n os de ballekes op woarn.
- En daddis?
- Ewew: de portier hee gêen baw’n nemêer…

Marc Van Hulle