Categorie: Tussen pot en pinte

Tussen pot en pinte (12)


De vôortien wirk’n van de rotarie



- E moar Achiel, daddis toch ôok wew een tijjken gelêen da’k a hiere gezien hè?
- Joat Lowie, moar ‘k zij ant spoar’n!
- Ant spoar’n? Gij? Ge keu gij nie spoar’n mee azô een goat in a hand!
- Ja lach moar, ’t is serjeus van deejze kêer!
- En woirvôorne spoarde gij tan? Vôor nen nieuwen otto? Of zitte mee een lief da geirne schoens kôopt?
- Neeje Lowie, ik spoare vôor te bien!
- Woarop goaje gij bien?
- Op appels en kezz’n!
- Wadde? Appels en kezz’n? ‘k Gelôove dadde toch een beetjen te lange in de zonne gestoan hèt van de zommere, zille Achiel?
- Toch niet, ik goa noar die veilinge in Woarschôot van de rotarie! Noar de vôortien wirk’n: neeng’n appels, zes kezz’n en vier peir’n!
- Ja, ik hoa dedie van de rotarie aw niet te hôoge op, moar ze keun’n nui ôok aw nemêer tew’n:
neengne plus zesse plus viere: daddis neengentiene en gêen vôortiene hé moatsen.
- Jaja kweetet wew, moar ’t goat om de geste!
- Z’hèn vôortien artiest’n en vijf beevee’s zô zot gekreeg’n dajnze iets artiestieks gedoan hèn mee die stikken fruit.
- Iets artiestieks? Wa moe’k mij doarbij vôorenstew’n?
- Ewew Lowie, den êenen hee nen appel beschiwderd, den anderen hee ter peetjes op getêekend,
nog nen anderen hee ter steentjes op geplakt, ter is tzewfs êenen dieter nen poetriw an geplakt heet!
- Ja miljaar, Achiel, en daddis amow kunst da goan verkocht word’n?
- Joat Lowie, vôor vôortien goede doel’n, gelijk dajnze bij de rotarie zegg’n.
- Goede doel’n, waddis dat nui were?
- Ewew Lowie, da gewd van die veilinge goa noar zieke kientjes, noar gehandiekapte, noar mejns’n mee nen hoek af?
- Nen hoek af? Noar de rotarie zewve dan?
- Lach moar Lowie, da goa veel gewd opbreng’n!
- En die beevee’s wie zijn dadde?
- Ewew Koentjen Loete zit doartuss’n, onzen burgemêestere.
- Ja, da zawd op wa trekk’n zekere? Dendienen is nie geweune van binn’n de lijntjes te kleur’n…
- En ôok Vietaw Borkelmans hee nen appele binn’n gebrocht! Mee aw de handtêekens van de beste voetbawders van België!
- Van Club Brugge? Moar da goa gewd goan, vôoraw lires pejzek…
- Nêeje Lowie, van de Rôo Duvels: van Kompanie en van Koertwoa en van Vitaw zewve natuurlijk.
- En ist doarop dadde gij goan bien, Achiel?
- Nêet, Lowie, ik goa bien op da kunstweirksken van nen anderen beevee, van Tanjatjen Dexters!
- Aw zekere komt dedie ôok noar die veilinge?
- Nêes Lowie moar zhee wew nen appele beploasterd, moar ze steek’n hem goe weg omdat hij veel gewd goa goan, pejzek.
- En wa stoat er op dien appele?
- Ewew, allemoaw meirk’n van bier: Zjupieleir, Kruugere, Stella, Rodenbach, Augustijn,…
- En woarom wiwde gij dienen appele hèn? Kom Tanjatjen hem zewve noar huis breng’n toch?
- Ik zij nogaw zot van een appelken vôor den dust…

Marc Van Hulle

Tussen Pot en Pinte (10)

De Grôote Uitdoaginge

-          Ha Achiel, ge zijt doare! Ge zoe gewd geejv’n vôor a nog ne kêer te zien!

-          Geef moar op Lowie, ik keune ze goe gebruik’n!

-          Ja, woarvôorne? Is den belastingsbrief van ’t stad toegekom’n toch? Of is Irma aw noar de sowd’n geweest?

-          Nêeje jongentjen, ik zij an ’t spoar’n vôor de grôote uitdoaginge van den 27sten septemmere!

-          De grôote uitdoaginge? Waddis dadde? Nen kêer nen gemêenteroad woar dajnze nie an’t zoag’n zijn?

-          Nêeje Lowie, daddis een grôote toafele van de Stoassestroate, owver den Moart toe an Leeganck.
En an die toafele goajn ze mee twie kêers 775 persôon’n zitt’n eet’n!

-          Amoaw tôope Achiel?

-          Ja Lowie, amoaw tôope! En binst dajn ze an ’t eet’n zijn, goan die jonge springerkes
van Espresjon mêer of twowv uur’n an êen stik stoan dans’n!

-          Jawadde, de die moen nogaw nen fieziek hèn! Twowv uur’n dans’n, daddis gêenen kakkedèj hé moatsjen.
Moar moest da Saratjen van Musses mij vroag’n vôor mee heur twowv uur’n op êenen tiggele te dans’n, tan zoe’k nie van nieje zegg’n.

-          Doar moeje a beuntjes nie op te wêeke legg’n Lowie, want da zawd eur voadere nie moeten weet’n!

-          ‘k Pejze’t ôok nie da Jantjen doar takkoord mee zoe zijn… Moar Achiel, van wie komt da gedacht vôor die lange toafele op de Moart?

-          Ewew, Lowie, daddis van Eddie Patjellie!

-          Ha, Eddie van Riadjen?

-          Ja Lowie, Eddie van Nazjibatjen. Hij pejsdege: ozzek ik hier in de Bakkerei nen brunsj keunen geejv’n vôor honderd man,
dan moet’er zeekers vijftienhonderd man noar den binn’n komm’n vôor nen botterkoeke binnen te speel’n.

-          Da goa zeekers lukk’n vôor vijftienhonderd Eeklônoars tôope an toafele te krijg’n.
Ge zegt dajnze wa vôor niet krijg’n en ge goater duust moet’n wêere noar huis stier’n!

-          Joamoar Lowie, zôo simpele is ’t nui ôok weere niet, zille.

-          Hoe wiwde zegg’n Achiel? Eet’n is toch eet’n? Of moeme ons piestoleetjes mee een mes en een ferset eet’n?

-          Nêeje Lowie, d’er meeug’n moar 775 Eeklônoars komm’n, die andere 775 moen van buit’n Eeklô zijn!

-          Van buit’n Eeklô? Gelijk Bawgroeke?

-          Nêeje Lowie, daddis ôok nog Eeklô, moar Aojgem, en Sente, en Woarschôot…

-          Os’t azô zit, goak nie komm’n Achiel.

-          Woarom niet Lowie?

-          Ke meuget nie gedrôomd hèn datter rechtover mij êen’n zit die van Moawdegem is!

-          Wa schiwter doarmee toch Lowie?

-          Wa schiwtere? Wiwde gij nen godgansen nechtink êenen hôor’n zoag’n owver ‘euzdren veuzn’ en ‘ajtne bajtn’? Nêeg toch?

-          Ha, moar ge zit tan nog beetere rechtover êen’n van Moawdegem vôor ’t eet’n, dan rechtover êenen van Klejt!

-          Oe wiwde zegg’n Achiel?

-          Ewew, in Klejt scheut’n ze dat ’t spejt!

Marc Van Hulle

Tussen Pot en Pinte (9)

Speesjaw vôor André

(Deze aflevering van Tussen Pot en Pinte speelt zich uitzonderlijk voor één keer letterlijk boven de hoofden van Achiel en Lowie af)

-          Miljaardé, wukkenen hoastegoard stoat er nui awtijd moar op mijn pôorte te bonk’n?
Jaja, een menuutsen, ‘k zalle doar goan zijn! Dendienen is ôok wew van nen hoaijze gepoept…

-          Ha, endeling’n goat die grôote pôorte hier open! ’t Wier tijd, zille!

-          Ja jongne, ‘k moek ik een endeken lôop’n, zille, en ‘k zij kik nemêer van de jongste, hé!

-          Moar ge keunt gerust honderd joar lieg’n, Sinte-Pietere!

-          Ha, gij kent mij? En wie zijde gij, ozzek da meuge vroag’n?

-          Ewew, ik zij André Delloart, van ’t Koaiken in Eek-e-lôo!

-          Eh moar André, ik hoa a hiere nog zô zêere nie verwacht!

-          ‘k Weetet, Sinte-Pietere, moar ik hoa onderweg een bende goeie seingeejvers gezet en azô kostek een beetjen affeseer’n hé!

-          Ge zij wewkom, André, we zijme allemoaw blije dadde hier zijt!

-          Da doe mij plezier, Sinte-Pietere, moar ge verstoat da kik nie zô blije zij? Ik hoa nog zôo vele te doen doar beneen.
‘k Moeste nog seingeejvers zoek’n vôor de ronde, ‘k woare beejzig mee mijn zondags rommelmoartjen op ’t Koaiken,
‘k moeste nog een beetjen schrijv’n an mijne revue vôor de moandagoavend van de Koaifeest’n,
en bij mijn klènkind Fleurken ister nog een kientjen op komste…

-          ‘k Weetet André, ge meugt ons da nie koalijk neem’n, moar niemand vertrekter geirne noar hiere. Moar ne kêer dajnze hier zijn, ist keiremesse!

-          Keiremesse? Moar doar kennekik wa van zille! ‘k Zatte aw die joar’n in de fêestroad van ’t stad, toe da’k gezien hè damme da beeter kost’n op ’t Koaiken!

-          Wemme daddier allemoale gezien, André, bij awder wordt er nogaw leute gemoakt hé?

-          Ge meugt gerust zijn, Sinte-Pietere, en ik hè awtijd geirne leute gemoakt.
Mee de karnavoaw, op ’t Koaiken, bij de Sportvriend’n,...
Moar ôok ozzek nog bakkere woarek, mee mijn broere Hubert!

-          Ja da weetek, André, want ozzek mee Voadere en mee Jeejzuus an toafele zittek,
vertellek awder awtijd da gij ne kêer een gesnee’n brôod schelleke per schelleke in de boate gestoken hèt bij iemand.
Ze komm’n tan nemêer bij, ze zitt’n tan mee troan’n in awder ôog’n…

-          Da wistek niet, da’k hier ôok aw supporters hoa! Dat doe mij plezier.
Wilfried, den echten deekenen van Eek-e-lôo zaw tsjaloes zijn ost hè dad hôort!

-          Ja André, we zijme wij hier allemoale een beetjen zot van a, want ge zij nen schôonen mens geweest.
Gij hèt veel mejns’n gelukkig gemoakt.

-          Stop moar, Sinte-Pietere, mee een beetjen krijgek hier rôoje koakskes!

-          Moar ’t is woar André, gij hèt awtijd gezorgd vôor de mejns’n dient nie gemakkelijk hoan, dien teengensloag’n g’hat hoan.
Da vind’n me wij hier schôone in den hemele!

-          Allez, hoak da geweet’n, ‘k zoe een Mariabeeldeken of een missiebusken van
onzen rommelmoart mee gebrocht hèn vôor awder kado te doen…

-          Ho André, da woar nie nôodig… Maria lôopt hier zewve rond, ge zaw ze nog wew teengn komm’n,
z’is tsews goe gemoat mee Gilaintjen, died op a zit te wacht’n!

-          Ha, moar doar goa’k zêere noartoe zie, want ‘k hè heur vele te vertew’n…

-          ’t Is goed André, moar os ge mij toch een kadootjen zoe meebring’n, tan hè ‘k messchien wew een gedacht…

-          Zegget moar Sinte-Pietere, ‘k zawder nog ne kêer omme goan noar beneen!

-          Ewew, da boeksken dadde geschreejv’n hèt, da zoe’k geirne ne kêer leejz’n…

-          Wukken boeksken? Van ’t Verzet? Of van ’t Koaiken?

-          Nêeje, André, da van ‘Liefde, seks en gewd’…

(André Dellaert is gestorven op woensdag 20 mei 2015 en wordt op woensdag 27 mei 2015 begraven.
Hij heeft zonder twijfel ‘zijnen hemele verdiend’ terwijl hij 87 jaar in Eek-e-lôo en op ’t Koaiken heeft rondgelopen.)

Marc Van Hulle

Tussen pot en pinte (8)

Twieduust Taptoe’s

-          Aw zekere Achiel, ge ziet er zô sportief uit mee a korte broek!

-          Joak hé, Lowie, wa vinder van?

-          Ghè gij nog schôone bêen’n, jongentjen, allêene zijn ze een beetje wit hé.
’t Zijn gelijk de mewkflass’n van de stassano!

-          Joamoar, ik wille een beetjen op Piet trekk’n!

-          Op Piet? Wukkenen Piet?

-          Ewew, Piet De Boats!

-          Piet van Taptoe?

-          Ja, Lowie, dendienen.

-          En woarom, Achiel? Waddister zô speciaw an Piet De Boats?

-          Ewew, dienen keirele rij rond mee nen Bentlie, rôokt dikke sigaar’n en droag korte broekskes in de zomere.
Ik beginne mee da broeksken, den otto en de sigaar’n vowgen loaters wew!

-          Ja allez, keroijze!

-          Ik doe dad ôok omdat Taptoe nui aw twieduust kêer’n verscheen’n is.
Twieduust! Dat is toch aw de moeite, hé Lowie?

-          Daddis woar! Vroegere keekek doar awtijd ne kêer in,
moar sinds datter gêenen Kaffeeklap nemêer instoat, interesseeret mij azô nemêer.

-          Das zjuust Lowie, da woar’n leutige vertewsekes. Moar nui stoander nog leutige ding’n in zille!

-          Ja Achiel, wukkene?

-          Ewew, ge keunt er azô de reeklamm’n uithoaw’n woar da Piet zewve omme geweest is.
Dedie woar dander schôone wijvekes in awderen biekienie of in awder ondergoed instoan.
Garantie dan dat reeklamm’n zijn die Piet zewve gekooz’n heet!

-          En die andere tan?

-          Ja jongne, ost vôor keukenkast’n, diepvriezers of gèsmasjien’n ist,
dan meugt er Evelientjen of iemand anders omme tert’n. Tenwoare…

-          Tenwoare wadde?

-          Ewew, Lowie, tenwoare datter in die winkele van die gèsmasjien’n een schôon jongsken achter de tôog stoat.
Dan droait Piet zijnen Bentlie ôok wew op dad hof!

-          Daddis nen keirel hé, den Piet?

-          Ge meugt gerust zijn, Lowie, azô moaken ze ze nemêer!

-          En weunt hij nog awtijd in zijn kastêew, Achiel?

-          Jabbèjoai, in Meirendree, tôope mee da dokteresken.

-          En z’hèn die twieduust Taptoe’s toch wen ne kêer gevierd hé?
Vroegere gaft hij awtijd feestjes in den Ambrozieja op de Krôone!

-          Kweetet nie Lowie, ‘k zij ne kêer binnen geweest op de redakse in de Meu, in dienen viela van Steyoarts.

-          En Achiel, een koepken gedronk’n mee den Piet?

-          Nêeje Lowie, nietmendalle!

-          Hoe kommet Achiel?

-          Ewew, den Tap woar Toe!

(Marc Van Hulle)

Tussen pot en pinte (zeejv'ne)

Pop Up restorantjen

-          Ha, Achiel, ge ziet er were zô kontent uit!

-          Joak, Lowie, ‘k zij gisteren mee Irma goan eet’n in Awst, bij Origo!

-          Origo? Is dat da zwart negerken da bij de Rôo Duvels speelt? Da manneken da zô zêere keunt gett’n!
Moest er hij mee mijn stuut’n vanonder zijn, ‘k zoe veel honger hèn, zille! ‘k Wiste niet dat hij ôok kost kook’n?

-          Nêeje Lowie, daddis Origi. Maaik Origi. Wuwdere zijn goan eet’n bij Jonasken en Feetjen van Origo!
Daddis da Pop Up restorantjen van op vtm!

-          Ah ja, ‘k hè doar aw van geleejz’n. Ons Marie is vrêed zot van da Jonasken. Da’s nen klènzeune van Tjenne Tollenoars hé?
Marie vindt dat een proper manneken mee een schôon kopken hoar. Moar ik hèt natuurlijk mêer vôor Feetjen, hé.
Azô een snew dingsken, mee azô van da friezelkeshoar, doar worrek zot van ozzek da zie.
Feetjen hee gôole doag’n in ’t woatere geleeg’n binst den woaterpolo, maar daddis ter nie an te zien, zille.
Da kind meugt awtijd an mijn toafelken komm’n, ‘k zoe kik blijv’n eet’n…

-          Joamoar Achiel, hè gij doar ôok nog wad anders gedoan dan noar ’t vrèwvowk gekeek’n?

-          Natuurlijk Lowie, è ja, ‘k moeste wew, want Irma woart er bij hé… Wemme doar een menuutjen g’eet’n.

-          Ja, en woaret een beetjen in orde? Want ‘k gelôove dat in de programma allemow specioale ding’n zijn vôor t’ eet’n?

-          Ja Lowie, Irma en ikke hèn doar paleo g’eet’n!

-          Paleo? Waddis dadde? Een soorte spaghettie?

-          Nêen jongentjen, daddis eet’n gelijk d’owbeweuners!

-          Oe wiwde zegg’n d’owbeweuners?

-          Ewew, gelijk vôor de Romein’n. Azô da vowk dad in een grotte weundege, mee een beirevew rondliep en ’t vier nog nie uitgevond’n hoat!

-          Ja, en wa speeldegen dedie dan binn’n?

-          Ewew Lowie: rendsvlêes, en notjes, en groensele, moar wew speciaw grêed gemoakt!
En da doen Jonasken en vôoraw Feetjen vrêend goed, doar in Awst.

-          Eet’n gelijk d’owbeweuners, moede gij doarvôorn speciaw noar Awst rij’n? Daddis toch ôok wew overdreejv’n?

-          Joamoar, Jonasken en Feetjen zijn wew van Eeklô, moar awder eethuizeken stoat in Awst op de moart.
En doar dien’n ze dad eet’n van d’owbeweuners op, dienen paleo damme zegg’n.

-          Ik moe doarvôorn nie noar Awst rij’n zille, eet’n van d’owbeweuners vinnek ik in Eeklô ôok!

-          Ja Lowie, da zoe’k ne kêer wiw’n zien, woar dadde gij hier zukken eet’n vindt.

-          Ewew, bij Den Beir!

-          Den Beir? Die frituure in de Meulestroate?

-          Ja, doar hèn z’ôok eet’n van d’owbeweuners en Karientjen meug ôok gezien zijn, ôok al hee dedie nie in ’t woater geleeg’n!

-          Oe zoen ze nui in een frituure eet’n van d’owbeweuners verkôop’n?

-          Ewew, Achiel: ze bakken awder friet’n in ossewit, ge keunt kiez’n uit nen beirepôot, nen kipknots of nen vuurvretere,
en os ge schôone in heur ôogskes kijkt, giet Karientjen der nog een schepken mamoetsesse bovenop!                        

Marc Van Hulle

Tussen pot en pinte (zesse)

Bloebaaik en Kambio

-          Ha Achiel, azô sportief, mee den velo!

-          Joak Lowie, wa vinder van?

-          ’t Is nen schônen, moar da blèw kleurken dat blekt toch een beetjen hé?

-          Joamoar, da moestek er bij pakk’n, want ’t is nen bloebaaik!

-          Nen wadde?

-          Nen bloebaaik, daddis ‘nen blèwen velo’ moar in ’t Engels!
En hij is bovenandien ôok nog nekêer vôor niets!

-          Awzekere, Achiel, iets vôor niets in Eeklô, da kom nie vele vôorn!

-          Kweetet, moar an de stoasse meugde van Kriestofken De Woale azô nen
bloebaaik meepakk’n vôor wat toerkes te doen.
Dus, woar wacht op, Lowie?

-          Ja jongne, ge weet dakkik nie geirne mee nen velo rije, hé.
‘k En hè gêen macht genoeg in mijn kiet’n vôor op die tertjes te steek’n.
Moestet nui nog nen eletrieken bloebaaik zijn, tan zoeker vôorn te vind’n zijn, moar nui niet.

-          Ewew, Lowie tan is dat ander spew van Kriestofken misschien iets vôor ui!

-          Wukken ander spew?

-          Kambio!

-          Kambio, is dadde azô iets gelijk de lotto?

-          Nêet jongne, gêene lotto moar nen otto!

-          Oe wiwde zegg’n, nen otto?

-          Ewew Lowie, wa vertoa doar nie an? Nen otto, iets mee vier wiel’n en een stuur!

-          Ee Kriestofken nui een garajze toch?

-          Neej, moar op da klèn parkingsken an de stoasse keunde nui nen otto vind’n die mee andere keunt dêewn!

-          Is dat op da parkingsken woar dat da lôlijk ijzeren spew stoat
woarvan datter gezejd wordt dat op nen ballon trekt?

-          Joat doare, niet verre van Car Dhondt. Doar stoat da Kambio-ottotjen van Kriestofken!

-          En meug iederêen doar nui mee goa rijen?

-          Joat, ge moe gêenen otto ne mêer kôop’n, ge meugt den dienen pakk’n os ge
ne kêer noar den Awdi, den Karrefoer of den Makro wiwt.
Of os a madam ne kêer noar den Iekeeja in Gent wiwt,
vôor ballekes in de tomattesèsse te goan eet’n!

-          Miljaar, ’t keun nie op vandeweeke: groaties velo’s, nen otto vôor te deew’n…
Zoen ze op ’t stadhuis een zwijntjen hèn da gewd schijt, toch Achiel?

-          Joamoar Lowie, ’t is nie zôo simpele: os ge azô een ottotjen wiw dêew’n,
dan moeje da wew doen mee iemand van de gemêenteroad!

-          Ge mêent da nie, Achiel?

-          Joakendoen! Zô woar of dak hier zittek!

-          Da keunt meevoawn, moar da keunt ôok gewewdig teeng’n voawn, pejzek?

-          Ge meugt gerust zijn. ‘k Goa a zegg’n: ’t is een vrêed klèn ottotjen, dus der is nie veel ploatse.

-          Miljaar Achiel, tan zoek dat ottotjen geirne ne kêer dêew’n mee Hieldeken Lampoart van den N-VA.

Da zieter mij nog een gezellig dingsken uit vôor ne kêer dichte mee in den otto te zitt’n!
Of mee Verstroatsen, van SMS!

-          Toch nie mee Pow Verstroate, Lowie?

-          Nêeje Achiel, mee da Tieneken, azô een vlietig dingsken.

En, viel da bij ui een beetjen mee os ge da Kambio-ottotjen gedêewd hèt?

-          Nêet jongne, van gêen kant’n?

-          Hoe, daddis toch leutig, azô tôope dichte zitt’n in een klèn ottotjen?

Tussen pot en pinte (vijwve)

Ka Drijje stopt niet!

-          Ha Achiel, ge ziet er zô schôone uit mee da tie shurtjen. Wa stoater doar op? Tôog mij ne kêer!

-          Kijk moar goed Lowie, ’t is eentjen van Ka Drijje!

-          Ka Drijje? Dat is da rostjen, da blondjen en da zwartjen dien azô kinderliedjes zing’n hé?

-          Kinderliedjes, kinderliedjes? Een beetjen op ’t gemak hé moat, daddis pure poweezie os ge dat die mèskes hôort zing’n!

-          Luistert Achiel: ’t zijn drij scheuntjes vôor noar te kijk’n, moar vôor noar te luisteren, daddis nog wad anders zille!

En bowvnandien: ze goander toch mee stopp’n!

-          Bettendoet Lowie, ze stopp’n zij niet!

-          Toch wew, dendienen mee zijnen lôlijken hond, hoe hêet hij nui were?

-          Gertjen Verhuwst!

-          Ja, Gertjen Verhuwst hee gezejd dat gedoan is mee Ka Drijje!
Ik vinne dat op een maniere wew spijtig, zille.
Ik woare nogaw zot van da blondjen, Josje uit Holland.
Ke moe pertant nie hèn van Hollanders hé, moar ozzek da beestjen beejzig zaggek,
kostet mij nie schiw’n dat eentjen van owver de schreejve woart.
‘k hè dikkes gepeist: moester azô een muis op mijnen zowder zitt’n, ‘k schoote mijn katte dôod!

-          Lowie, zij gerust: Ka Drijje goat er nie mee stopp’n! Moar Josje goater nie mêer bij zijn!

-          Ha nêeje? Wie dan wew?

-          Kijk, ik hè hôor’n zegg’n dat ’t stad iets ant meroakelen is voor 775 joar Eeklô!

-          Ge mêenet nie?

-          Joakendoen, ze goan Ka Drijje nieuw leejv’n inbloajz’n!

-          Hoe weete gij da Achiel?

-          Ewew, ‘k zij gisteren vôorbij den Herbakkere gepasseerd en doar hekket ghôord!

-          Wadde Achiel? Ge moak mij peirdenieuwsgierig!

-          Ewew, ik hè hôorn zing’n!

-          Ja, da zoeter nog an mankeer’n, der wort doar gôole doag’n gezong’n.
Ten trekter nie awtijd op, en ’t zit veel getsjonk tuss’n, moar zing’n doen ze doar vele!

-          Joamoar Lowie, ’t woart een liedjen van Ka Drijje dak ghôord hèn!

-          Ja, wukken liedjen? Van Afrika toe in Amerika, zekers?

-          Ja Lowie, moar tan in ’t Eeklôos!

-          Aw zekere, hoe klinktege dadde tan?

-          Luistert, ‘k goat ne kêer vôoren zing’n:

Van an den Teut toe in het Lêen

Van Owverdijzers tot in Bawgroeke

Arm in arm, mond op mond

Op de moart woar de friture stond!

-          Moar daddis schôone? En wie zongter dadde, Achiel? De Wewgezinde?

-          Nieje Lowie, Ka Drijje van Eeklô!

-          Ja en wien is dat tan?

-          Ewew: Koentjen, Kriestofken en Keuninksken!

Marc Van Hulle

Tussen pot en pinte (viere)

Nen Biekieburgere in mijnen hof

-          Ha Achiel, wa schiwtere, ge lôopt zô kontent manneken!

-          Joak Lowie, ke wete mee mijn èjne gêene weg van kontentement.

-          Hoe kommet? Ge noater toch gêen zesse zjuust op de Lotto, hé?

-          Nêenek Lowie, moar kè nen vrêende schôonen kôop gedoan vandeweke!

-          Ja, verteldop. Nen nieuwen otto? Of nen nieuwen harliesteekthemzewve?

-          Nêeje Lowie, ik hè da frietkot van op de Moart gekocht van Karientjen van Bolleken geweest.

-          Die zwarte frituure die daw mêer of een moand toe stoat?

-          Ja, dedie. Doar koste vroegere de beste friet’n van Eeklô kôop’n mee de beste stowverijsesse! En dedie is nui van mij!

-          Ja miljaar, Achiel, en wa schikte doar mee te doen? Want ze meug niet op de Moart blijv’n stoan hé.
Doar moender vandezomere allemoaw terraskes komm’n.

-          Kweetet, Lowie, kweetet. Moar ik hè der aw een schôon ploatseken vôoren gevond’n!

-          Ja, woardadde?

-          Ewew, an mijn terras in mijnen hof!

-          Ge mêenet niet? Een frietkot in annen hof? Irma zawda geirn zien komm’n!

-          Joamoar Lowie, ge ziet toch wew wukken vôordêewn dat da goan hèn vôor mij?

-          Veel stank van frietvet, da weetek. Moar vôort van de reste…

-          Jongne, gij goat nog aw een beetjen tsjaloes zijn van mij.
Zieje mij doar aw zitt’n: nen grôoten bak friet’n in mijn êen hand en een friekandelle, een boelette,
nen kawkoensatee en een vlêeskrokitte in mijn ander hand!
Bowvnandien nen grôoten klets manijze, nen schep andjuuntjes en een potjen stowverijsesse vôor den boel kompleet te moak’n.

-          Ja moatjen, ik zoe nie geirne unne kollesterow zien doarachtere!

-          Aw Lowie, ik hè ’t vôornoamste nog vergeet’n: mijn deessirken! Nen Biekieburgere!

-          En wa drinkte doar tan bij? Nen hawven bak Export van den Kruugere?

-          Bè nêen Lowie, een bleksken Cola Laaijt, nen mens moet een beetjen op zijn lijne lett’n hé?

-          En hoe goat da frietkot hêet’n?

-          ‘k hè nen schôonen noame, vindek. Moar wew een beetjen lange: ‘Lekkere frietjes bij den beir van de siexties’!

-          ‘k Verstoa sebiet wat dadde wiw zegg’n, Achiel! En is Irma ôok azôo nen grôoten frietetere gelijk gij?

-          Nêet jongne, spijtig genoeg niet. Ze zoe zij nen kêer een sateetjen eet’n, goe gekruid. Of een potjen vollovan.
En doarbij een klèn posseetjen friet’n…

-          Ha, moar azô kenn’n me ons Irma hé?

-          Hoe wiwde zegg’n Lowie?

-          Ewew, z’is zij aw gôwzeleejv’n kontent mee een klèn zaksken…

Marc Van Hulle

Tussen pot en pinte

Nen grôoten klets manijze…

-          Ha Achiel, blije da’k a nog ne kêer zie! Een pintjen, moat?

-          Ja Lowie, geef mij zêere een pintjen, en bestew moar azô een tallôorken salamietjes ôok vôor doarbij!

-          Aw zekere, grôot’n hongere toch?

-          Zwijg Lowie, ik moe dringend op een stiksken vlêes keunen knabbelen!

-          Oe, wa schiwter toch, Achiel?

-          Ons Irma hé, Lowie, ons Irma: z’hee were ’t zot in heur bolle! Ze doe nui mee an da spew vôor de vast’n: tfôortig doag’n zonder vlêes!

-          Ja miljaar, doar zoe’k toch ôok nie keun’n mee lach’n zille!

-          An wie zegdet! Da spelleken duur nui aw een gôole weke en ge keunt nie gelôov’n wa dak aw in mijn klôot’n hè moet’n speel’n:
vis, vis en nog ne kêer vis. En qorn-hamburgers!

-          Qorn-hamburgers, wa zijn dadde Achiel?

-          Ewew, da trekt op hamburgers, moar ’t zit doar gêen vlêes in. En ’t smoakt een beetjen noar rokwolle,
ge weet wew, da spew woa dajje anne zowdere mee keunt isoleer’n?

-          Ja, moest mijn Marie doar mee afkom’n, ‘k zoe ôok rap achter een potjen salamietjes komm’n noar hiere!

-          Gij moet nie vast’n Lowie? ’t Is pertan wew ne kêer nôdig ok a buiksken zie!

-          Ja Achiel, ik moe zeker nie vast’n. Moandag hee Marie mij een endeken bloewust gebakk’n, mee appelmoes.
Dissendag hoa ze een stiksken uit d’hespe grêed gemoakt.
Woensdag hemme friet’n mee stoverij binnen gespeeld. Gisteren woast een kew platjen mee gekookt hespe,
wa schellekes salamie en nen grôoten klets manijze.
En vandennoene hemme een koashamburgerken sowdoat gemoakt!

-          Zwijg Lowie, ken keuner niemêer teengne.

-          Joamoar, ons Marie wiwt da’k kloek op mijn bêen’n stoa, zille! Want we doeme wij ôok an iets mee!

-          Ja, ’t zaw toch gêen tfôortig doag’n zonder vlêes zijn?

-          Nêet Achiel, ’t is an wad anders!

-          Goat mij nui nog vertew’n, of wadde?

-          Ewew, Marie en ikke doen mee an ‘alle doag’n seks’!

-          Aw zekere! En dadde op ui ewde!

-          Ja moat, alle doag’n goak van de grond! Ten messan niet da’k al op tram zeejvene zitte!

-          Ja, nie allêene op tram zeejvene, azô thôor’n!

-          Och Achiel, ge moe nie tsjaloes zijn. En ge moe zeker gêen kompasje hên mee mij.
Ge zoe beter een beetjen inzitt’n mee Kriestofken en Niekolleken!

-          Kriestofken De Woale, de scheepnen, en Niekolleken De Muntere, dedie van den brandweer?

-          Oe, dedie van den brandweer?

-          Ja, Lowie, os dedie ne kêer in nen lach schiet, ist gelijk de brandweersireine die goat? Moar wa schiwter mee?
Doen dedie ôok mee an ‘alle doag’n seks’? Daddek doar nooit in gezien, in die twieje…

-          Moar nieje Achiel, doar doen ze nie an mee?

-          Toch nie an ‘tfôortig doag’n zonder vlêes? Da gelôovek nie van Kriestofken!

-          Nieje Achiel, ze doen mee an ‘tfôortig joar zonder knip!

           Marc Van Hulle