Categorie: Tussen pot en pinte

Seks in den Boeloare

-          Ha, Achiel, waddister mee ui gebeurt? Ge blinkt gelijk nen graan andzjuun?

-          Ja Lowie, ‘k zij ne kêer noar Riatjen geweest in den Boeloare.

-          Riatjen? Wien is dadde?

-          Ewew, daddis da Tuuneejsies madamken dat op den hoek van den Boeloare en de Meulestroate nen welnes gemoakt heet.

-          Nen welnes, Achiel? Waddis dadde?

-          Ewew, doar keunde a nogal een beetjen loaten goan, zille vent.
Da begint mee een massazjeken van top toe têen, tan moede in azô een hettne kot kruip’n woar dadde
begint te zwêet’n dat den dôom uit ui ôoren komt en tan meugde in de jakoezie!

-          Wa moek mij doar bij vôorenstew’n, bij nen jakoezie?

-          Ewew, daddis een grôote badkuipe en da woatere broebelt awtijd moar.
Da’s gelijk thuis, os ge in a bad een scheetje loat, moar doar rieket betere!

-          En da madamken die da boelken openhewt, hêet Riatjen?

-          Joat, kijk, ‘k hè een koartjen meegepakt: Riad Nazjiba!

-          Ja Achiel, ’t zit doar wa tôope hé, in den Boeloare? Aw da schôon vowk?

-          Ge meugt gerust zijn Lowie, den burgemêestre weet wew woarom dat hij hier een appartementjen gekocht heet.

-          Pak nui Dafneetjen Oars.
Os dedie teeng’n mij zegt: ‘Moeje ne kêer van mijn krokitjes proev’n’, ewew, tan zoe’k gôow dienen frietex opeet’n!

-          En wa pejzde van Neeleken? Van de Witte Zwoane?

-          Ja Achiel, doar èk ôok een beuntjen vôor’n zille, een gôole boale tsewfs!

-          En doar neefest, Peetratjen van den Arguus: dedie zegt awtijd ‘pannekoeksken’ teeng’n mij.

-          Joas zekere, Achiel? Ik goa doar ôok geirne, ’t is allêene moar spijtig dajnze doar nen openen keukene hèn.

-          Ja woarom, Lowie?

-          Ewew, Peetratjen heure vent stoat awtijd moar vies te kijk’n ozzek mee heur een klapken stoan te doen.
‘k Pejze dat hij een beetjen tsjaloes is?

-          ‘k Pejzet ôok, daddis spijtig hé?

-          Joat Achiel, en weete wat datter nog spijtig is? Da Lieveken van Dekkers vertrokk’n is uit den Boeloare.
Ge weet wew, da schôon kind mee heur wit kopken hoar uit de parfuumerie Carin Spreej?

-          Ah deddie? Ja doar gingek veele binn’n met ons Irma achter heur favoriet riekwoatere.

-          Nen Sjanel numéro vijve, Achiel?

-          Nieje, Lowie, nen zeejvnenvôortig ewve! Ode kolonje!

-          Owver riekwoatere gesprook’n: wa vinde van de zusterkes an den overkant?

-          Weunder nonnekes in den Boeloare, Lowie?

-          Gêen nonnekes, gij wiepedej, moar twie gezusters: Anjaten en Véronieksken van da boetieksken ‘Mooi’.

-          Ja daddis doar ôok de moeite, allêene, ze moen da manneken mee zijn boartjen uit awderen winkel hewwen.

-          Frankietjen, wiwde zegg’n? Moar doar goan ze gêen last nemêer van hèn, zille!

-          Ah nêeje? Hoe kommet?

-          Frankietjen goa noar Holliewoet! Vôor mee te doen in nen seksfielme!

-          Frankietjen in nen seksfielme? ‘k Meuge der nie an pejz’n! Wukkenen fielme goat dat zijn, Lowie?

-          Os ge zijn kopken hoar ziet, moede toch nie twijfelen: ’t vijftig tinten grijs!

Marc VAN HULLE

Exclusief voor deze blog!

Tot voor enkele jaren verscheen in het weekblad Taptoe Meetjesland regelmatig de rubriek ‘Kaffeeklap’,
in het Eeklose dialect geschreven door Marc Van Hulle.
De reeks werd plots stopgezet, maar de goesting van de auteur om verder in zijn moedertaal, het Eekloos, te blijven schrijven is gebleven.
‘Toen Awbeir me vroeg om af en toe eens een Eekloos stukje te schrijven voor zijn blog, heb ik niet geaarzeld’, zegt Marc Van Hulle.
‘Ik weet dat Awbeir dezelfde liefde voor zijn stad koestert als ik en ik volg al jaren met veel respect zijn goedgestoffeerde blog.
Met ‘Tussen pot en pinte’, de nieuwe naam van de oorspronkelijke ‘Kaffeeklap’ wordt die misschien nog een beetje meer Eekloos.
Veel leesplezier, alvast.
En misschien een tip: als je de tekst niet onmiddellijk begrijpt, lees hem dan luidop. Dat helpt, net als nen goeien dreupele erbij…’

Tussen pot en pinte

Eeklônoare van ’t Joar!

-          Moar wie damme doar hèn: Achiel! Daddis ôok wew lange leen!

-          Joat Lowie, ‘k weetet, moar nui zijme hier were! Irma keunt er were teengne da’k af en toe ne kêer een pintjen komme drink’n.

-          Ja vent, dat doe mij plezier! Pakt a moar nen gloajznen boterham op mijn kost’n!

-          Merci Lowie, merci. Moar ’t moe mij van ’t herte dat allemoale veele veranderd is sinds onzen loasten babbele.

-          Oedadde, Achiel, waddis ter veranderd?
’t Rijen nog awtijd evenveel otto’s in den binn’n, d’er wordt nog awtijd gezoagd op den gemeenteroad, zjuust de fécé speel wa betere…

-          Nêeje, Lowie, ik pejze an die jonge gast’n. De CD&V-jongeren, damme zegg’n.

-          De CD&V-jongeren? Zijn dat de kleine tsjeejv’n, Achiel?

-          Joat. Allez, ’t is te zegg’n, zô kleine zijn ze nui ôok were niet.
Os ge Blomme, de vôorzittere, pakt: da manneken is zekers twie meters grôot en weegt garantie honderd kilo, drôoge an den hoak!

-          Ja, moar wa schiwter doar nui mee?

-          Ewew: die jonge gast’n hên awderen Eeklônoare van ’t joar gekoz’n: Henk Fiecent, ge weet wew, de zeune van Raf, de moartleidere geweest.
En de schôonzeune van mêester De Zuttere, die vôor ’t Vowksken schrijfdege?

-          ‘k Hent geleejz’n. Daddis toch een schôone keujze? Henk hee toch die nieuwe klinieke van Awma an de Ringboane gezet?

-          Kweetet Lowie, moar ik begrijpe da toch nie goed zille.

-          Woarom nie, Achiel?

-          Ewew: die klène tsjeejv’n, da zijn allemoaw jongens en mèskes van een joar of twintig.
En dan ister doar een lijstjen mee meugelijke kannidoat’n vôor awderen Eeklônoare van ’t Joar. En wie stoater doar op?

-          ‘k Zoet nie weet’n, Achiel.

-          Vôor te beginn’n: Pascalleken Noassens en Dafneetjen Oars. Da zijn toch twie pronte kien’n, hé Lowie?
Ze keun’n bowvnandien nog goe kook’n ôok, wa moe nen vent mêer hèn? Moar die jonge keirels van de tsjeejv’n kiez’n doar nie vôorne!
Moar die mèskes zijn nie betere zille, want wie stond er nog op awder lijstjen: Djosh Lasjden en Michaël Vrijmoed!

-          Wiendadde, Achiel? Vrijmoed kennek, daddis den dienen van de vellefabrieke, hé?

-          Nêeje Lowie, Vrijmoed hee een sterrenrestoran in Gent en ’t is ôok een schôon ventjen!
En dienen Djosh Lasjden moakt alle joar’n van zijn ôore op Tomorrowland, ge weet wew, da festivaw woar dan d’Aorme Kloar’n noartoe goan?
Ewew, ôok de mèskes van de kleine tsjeejv’n hèn doar nie vôore gekoz’n.
Z’hèn den ewsten angeduid en ‘k durve wett’n dat hij nog nie keun kook’n ôok…

-          Woarom hejnze dat tan gedoan, Achiel?

-          ‘k Pejze dakket weetek: ’t woart den êenigsten van de vijwve die vrêed kontent woart mee die lôolijke foajze dien de klène tsjeejv’n an de winnoare gav’n…

Marc VAN HULLE

Henk Vincent, Eeklonaar van het jaar.