Vliegtuigen spotten
Na het versoepelen van de lockdown is onze Jörgen Lammens terug op (foto) jacht gegaan
en bracht, zoals we van hem gewoon zijn, mooie exemplaren mee.
Toch wel een indrukwekkende machine.
EEKLO NIEUWS EN NOG EEN BEETJE VAN ALLES
Vliegtuigen spotten
Eeklo in vroegere jaren (Kerkstraat)
De hemel in brand
Eeklo in vroegere jaren (Rabautstraat)
Eeklo in vroegere jaren (Gentsesteenweg)
Tussen pot en pinte (32)
Kerstspew
- Ha Achiel nen loaten zoaligen hôogdag hé moatjen!
- Merci Lowie, vantsewfste. Een beetjen gevierd?
- Oh, ’t woar kalme thuis. Een platjen van Ronnies binnengespeeld en tans nen gôolen oavend noar
komedie op teevee gekeek’n.
- Woarter komedie op teevee op Kèsoavend? Normoaw is da toch van de Sound of Mjoesiek mee
aw die kientjes en da nonneken?
- Joamoar Lowie, ik hoa nog wat dingen die’k opgepakt hoan en woar da’k tôope
mee mijn wijveken noar gekeek’n hèn. En leute damme ghad hèn!
- Ja, wa woaret toch?
- Ik hoa nog wa èwe afleejvering’n van de gemêenteroad, van de laaifstrieming gelijk dan ze da noemdegen.
Spijtig damme da nui nemêer te zien krijg’n.
- Ha moar tan èk goe nieuws Achiel!
- Ja wadde?
- Ewew ik hè ghôord dan dedie van ’t schepencolleejze en de gemêenteroad tôope een kerstspew goan opvoer’n!
En ik weete tsews wien da wie goa speel’n!
- Nui moakte mij nieuwsgierig Lowie!
- Jozef wordt gespeeld deur burgemêestere Luc en omdat een modeirn kerstspew is, droagt hij gêene lange mantele,
moar een wit vestjen mee korte mewkes. Maria daddis Isauratjen en z’is een beetjen over tijd.
Moar z’is da geweune van mee den weirk’n an den Herbakkere hé.
- Daddis zjuust.
- Den herdere, daddis Bobken, die gôole doag’n in ’t gès noar zijn schoapkes zit te kijk’n.
Hij hoa nog nen hulpherdere, Màtyàs, moar den dienen is noar nen anderen staw gelôop’n.
- Aw zekere!
- En dan zijnder de keuning’n mee kado’s. Keuning Marc hee gewd mee, nie vele moar toch genoeg om die
kleinen van de zomere in ’t zand te keunen loaten speel’n. Keuning Kriestofken hee wierôok mee,
moar draogt gêen kreuntjen moar zijnen briw op zijn hôofd.
En keuning Dannie droagt nen rozen training en hee wa mee van Albert Heijn.
- En wien ister ’t kientjen?
- Awew, da woar nie simpele, moar ’t is de kleinste van den hôop geword’n: Anneken Van Den Driessche meug
een pamperken andoen en op ’t strôot goan ligg’n.
- Aw da vowk, kost’n dedie allemoaw binn’n in den herberg?
- Jabejoas. Den boas hoat een poar moand’n tevôorn zijn prijzen opgesleeg’n, en doarom kwamter wa minder vowk.
Gelukkig moar, want ’t kindeken kreeg aw rap bezoek!
- Ja van wiene?
- Een bende herders van an den owverkant kwam’n Jozef en Maria geluk wensen en ze brochten ôok kado’s mee.
Herder Hilde hoa een rolle tuinafvawzakk’n mee. Herder Koentjen een bladkorve en
reuzenherder Gertjan een bon vôor nen ballonvlucht.
- Da zijn schôone kado’s. Doar woarn ze toch wew blij mee?
- ‘k Weetet nie Achiel, want plots begostet vrêed te woaien! Alles wier weggebloajz’n!
- Da vonden ze ôok wew nie leutig toch?
- Joasendoen, ze vonden da wew OK!
- Ha, Lowie, hoe komt dadde?
- Ewew, ’t woar nen nieuwen wind…
Marc VAN HULLE
Ridder Awbeir
Tussen pot en pinte (31)
Tussen pot en pinte 31
Hij zit op zijn peird…
- Hey Achiel, oe ister mee jongne?
- Goed Lowie, goed. ‘k Voele mij volledig in forme!
- Ha ja, hoe komt dadde?
- Ewew, ik hè mij nen vélo gekocht!
- Nen vélo, Achiel? Nen Harlie-steekt-hem-zewve?
- Jip en ik hè nen vrêende slag gesleeg’n!
- Ja, is êen mee nen batterie toch?
- Banêet Lowie, da keu mijnen bruinen nie trekken zille!
- Is êen van de Awdie of den Karrefoer?
- Nêet jongne, ge zij mis. Tenandere, verkôopn ze zij doar ôok vélo’s?
- Kweetet niet. Moar vertew mij ne kêer wukkenen slag dadde gesleeg’n hèt.
- Ewew Lowie, ’t is een akkoaijze!
- Een akkoaijze? Andermans mizeere wiwde zegg’n?
- Toch niet, ’t is nen schôone vélo, goed onderhèwen en vôor een zocht prijsken!
- Allez, ge moe gij nie schôone zijn vôor sjanse thèn hé?
- Jaja, Lowie, lach moar. Ge zijt gij tsjaloes!
- Joakendoen, hoe zoe kik tsjaloes moet’n zijn op iemand die nen vélo kôopt? ’t Is leen van mijn plechtige
kommuune da’k nog ne kêer op azô wadde gezeet’n hèn.
- Ge zoe beter een beetsje mêer mee den vélo goan rijen, da zoet a deugd doen.
- Awawaw, Achiel, nie beginn’n gelijk Bobken hé? Ge goa mij niet verplicht’n vôor op nen vélo te kruip’n zille,
ôok aw schiwderen ze vélopatt’n van drij meeters brêed.
- ’t Is in alle gevaw goed vôor de kondiesse!
- De kondiesse mijn ôore. Moar vertew ne kêer: dendienen van wie dadde dienen vélo in okkoajze gekocht hèt,
moet dendienen nie an zijn kondiesse pejz’n?
- Neej, hij hee gênen vélo nemêer nôdig.
- Aw, hij is toch nie ziek of wadde?
- Neej, moar hij rijdt nui mee iets anders!
- Mee nen otto? Of mee nen brommere?
- Nieje, mee een peird!
- Mee een peird, vanzeleejvne. Da goa Bobken geiren hôorn! Dat is goed vôor de CO-twie. En os da peird ôok
nog ne kêer schijt in de Stoassestroate, keuter hij de middenbirme mee bemest’n…
- Lach moar, ’t is pertan nie vôor te lachen, dienen mens mee zijn peird!
- Ha nêeje, wa schiwt er wew mee? Kennek hem toch?
- Joag, ’t is Awbeir, de portrettentrekkere!
- Awbeir? Woarom rijdt dienen vent nui mee een peird? Moet hij van Daniëlla toch?
- Baneej, moar hij is riddere geword’n…
Proficiat Albert!
Marc Van Hulle, collega-ridder
Eeklo in vroegere jaren (Fc Eeklo)
Tussen pot en pinte (30)
Tussen pot en pinte 30
Eeklô Bietsj
- Ja Achiel, ge stoat er zomers op! Een zwemshortjen, zwemvliez’n, nen duikbriw, een schupken en een êemerken,…
woar goade noartoe toch? Noar Katzand? Of noar De Groe?
- Nêeje Lowie, ik komme van ’t Herbakkersplèn en ik goa noar de Moart!
- Wa woart er te doen op ’t Herbakkersplèn toch?
- Ewew, Eeklô Zingt!
- Eeklô Zinkt? Onder woatere?
- Nêen, nie zinken moar zingen, wiepedaai!
- Ha, daddis wat anders!
- Ja, en Luuksken, onzen burgemêestere, keunt nogaw goe zing’n zille! Tôope mee Isauratjen,
die groene schepeninne. Ze stond’n doar tôope op ’t podium van awder ôore te moak’n!
- Allez, ’t woar gelijk Niekow en Uugo?
- ’t is te zegg’n, gezien het leeftijdsverschiw êerder een beetjen Eriek en Sanne… Moar nui goak noar den Moart!
- Noar de Moart, mee die klêern an?
- Ja, noar Eeklô-Bietsj!
- Eeklô-Bietsj? Waddisdadde?
- Ewew Lowie, aw da zand dan ze van den middenbeirme geschept hèn, goan ze nui op de Moart smijt’n en
vandezomere meugen we doarin lôop’n en speel’n!
- Een strand op de Moart?
- Juust Lowie, moar als goeie Vloaming’n zegg’n me dadde in ’t Engels: Eeklô-Bietsj.
- We goame dus nemêer keun’n parkeern op de Moart?
- Nêem, drij week’n niet!
- Ja en wa zegg’n de caféboajz’n doarvan, Achiel?
- Ewew, dedie zijn doar content mee, schijnet. Ze hoop’n dan ze gelijk an de zêe ôok volle terraskes goan hèn.
- Allez, de zêe in Eeklô! Wa goame nog allemoale beleejv’n!
- Ja jongne, ’t schijnt datter nen nieuwe wind in Eeklô woait, moar ’t is thoop’n dat da nie binst Eeklô Bietsj is,
want tan goat nogaw stuiv’n…
- Moar nui wordt er mij vele duidelijk, Achiel!
- Oe wiwde zegg’n Lowie?
- Ewew, Niekolleken De Muntere is gestopt als vôorzittere van den Eekonomieschen Road hé?
- Joas, da kind hoa veel te vele an heur hôofd hang’n.
- En weete wien datter heuren opvowger geword’n is?
- Nêenek Lowie.
- Ewew, Thierry Smet
- Smet? Van de begroaving’n?
- Ja dendienen!
- Oei, goat zô slecht mee onze ondernemers datter nen korbillard moet’n vôorne rijen?
- Bènêet Achiel, moar der is wew een andere reed’n woarvôorn dajnze Smetjen den
begroavenisondernemere gepakt hèn!
- Ja Lowie, zeg nekêer
- Ewew, mee aw da zand op de Moart moest’n ze êen hèn die goed mee een schuppe keunt wirk’n.
Marc Van Hulle