Snoeien

Tussen pot en pinte 37

Zet ne kêer nen scheepne bij de kerstbôom!

 
 -     Ha Achiel, da zijn tijden hé? We keume mekoar nemêer zien an den tôog of op een terrasken vôor
       een klapken te doen…

 -     Ja Lowie, en dus goame tôope een wandelingsken doen in ’t Stekkebosken, mee een bleksken bier in
       ons hand’n. ‘k Zoe veel liever nen Export drink’n in ’t Kabèterken, moar doar stoame mee ons twieje
       aw veel te dichte op mekoar.

 -     ’t Is beuj, os ge een tallôorken koas en salamie wiwt, moejet zewve snij’n. En vôor een portie woarme
        hapkes moeje zewve ’t frietvet woarmen…

 -     Ja, nen mens zoe van mindere owverschoakelen op tsieps en notjes hé?

 -     Weete woar da’k ik aw vele an gedacht hèn Achiel?

 -     Aw, nui goamet hôorn zie!

 -     Ewew, an aw die mensn die thuis allêene zitt’n en gêen bezoek of klappenansje hèn. Vôor dedie goat da
       nen langen winter word’n pejzek…

 -     ’t Is woar Lowie, moar gelukkig zorgt ’t stad vôor een oplossinge voor de mensn dien allêene zijn!

 -     Ha? Goan ze awderen toer doen mee de kaffeekanne, gelijk binst de kiezinge toch?

 -     Nêes Lowie, moar z’hèn op ’t nieuws gezien dat er nen fierma bestoat die kartonne peet’n moakt op woare
       grôotte! Ge keunt dedie kôop’n mee de klènkinders op, of mee een èw lief, of mee a schôonmoedere…

 -     Ja en hoe goat dat de êenzaamheid van bij ons oploss’n?

 -     Ewew, ’t stad hee azô kartonne peet’n van ’t scheepencolleejze en de gemêenteroad loat’n moaken!

 -     Ge mêenet niet?

 -     Toch wew, dus os ge Kriestofken De Woale, Hieldeken Lampoart of Koentsjen Loete bij ui an de kerstbôom
        wiwt, keunde dedie kôop’n! En tan stoan dedie toe achter Nieuwjoar in de lievink, ze zijn proper op awder
        eigne en ge moet da gêen eet’n geejvn.

 -      Miljaar, ik goa sebiet êen’n bestewn! Hoevele kost azô een Eeklôos peetjen?

 -     Dat hangt er van af Lowie, wien dadde bestewt!

 -     De burgemêester is dierdere zeker?

 -     Toch niet, tewoare dadde persé diene foto mee zijnen Tesla derbij wiwt, tan ist wa dierdere.
        Moar bijvôorbeeld Kriestofken kost mêer of nen anderen.

 -     Ja, hoe komt dadde?

 -     Ewew, daddis nen moeilijkeren kapvorme, mee dienen briw op zijn hôofd. En ôok vôor Gertjan Blomme
       betoawde een smeete mêer, moar der is doar ôok veel mêer karton vôorn nôdig hé…

 -     Da verstoak. Zijnder nog speciallekes?

 -     Ewew, sinds vandeweeke zijnder van Bobken twie versies: eentjen in geweun karton,
       en eentjen in geresiekleerd karton, van oste nog bij de groene woart…

Marc Van Hulle

Tussen pot en pinte 36

Gekleurde stoaskes

  -       Ha Achiel, hoe is’t? Een pintjen?

  -       Nêeje Lowie, geef mij moar een woaterken!

  -       Aw zekere, een woaterken, wa schiwtere?

  -       Ewew ik wille een beetje vermoageren.

  -       Ah, heeft Irma gekloagd toch?

  -       Bènêes, moar ik wille den donderdag nog awtijd mijn kaffeetjen bij Neleken en Pieterjan van
          de Witte Zwoane goan drink’n.

  -       Ee Neleken gevroagd vôor te vermoageren dan?

  -       Ôok niet Lowie, moar ozze wa smallere zijn dan keunek gemakkelijker tussen da moartkroam en de
          muur kruip’n vôor binnen te geroak’n in de Witte Zwoane…   

  -       Ja jong, wiens gedacht woar dadde? Ne mens zoe wew wegblijv’n van de moart…

  -       Toch nie, Lowie, want op de moart hôorde en ziede nogaw wadde zille…

  -       Aw, vertewd op!

  -       Ewew, binst da’k mij tussen da kroam en de muur van de Witte Zwoane an’t wring’n woarek, zaggek da
          de scheepninnen Anneken en Isauraatjen noar da kroam van de kèss’n ging’n.
          ‘k Pejze, doar moe’k ’t fijne van weet’n!

  -       En? Hèjn ze panties mee zjartels gekocht?

  -       Nêes Lowie, z’hèn zeejv’n poar gekleurde stoaskes gekocht. Een poar voor Luuksken,
          den burgemêestere, en zes poar voor de scheepn’s!       

  -       Daddis ôok wew oardig?

  -       Ge meugt gerust zijn, doarmee hèk awder gevowgd. Ze gingen dermee noar de Poaterskirke en doar
          stond de reste van ’t schepencolleejze te wacht’n op awdere.             

  -       Spannend hé?

  -       Joat Lowie, moar ’t wordt nog spannender. Ik zij achter awdere binnen gekroop’n in de Poaterskirke
          en wa stond er doare? Nen cameraploeg!

  -       Aw zekere, van AVS?

  -       Nieje, toch niet. Moar ‘k hôordege awder wew afspreek’n dajnze van iedere scheep’n en van den
          burgemêestere een apoart fielmken ging’n moak’n, moar ze moest’n doarvôorn wew awder gekleurde
          stoaskes aandoen…

  -       Moar Achiel, ’t is gêen woar! Daddis tan gelijk bij die Bekende Vloaming’n dien in awderen blôot’n mee
          gekleurde stoaskes een fielmken gemoakt hèn vôor op Feejsboek! Den dien’n van ’t Rad van Fortuin,
          en Sjoon Dont, en Stan van Samang!             

  -       ‘k Pejsdeger ôok sebiet an, Lowie.

  -       Miljaar ge meugt toch nie gedrôomd hèn dad ons scheep’ncolleejze zukken fielmkes oppakt hé.
          Akkoord datter nen nieuwen wind is, moar daddister toch owvere hé?

  -       Gelukkig woarn’t andere fielmkes en al eejv’n gelukkig mee klêer’n an.
          Moar wèw mee gekleurde stoaskes.

  -       Wukken fielmkes zijnder tan gemoakt?

  -       Ewew Lowie, iederêen mocht één zinneken zegg’n, en ’t fielmken begon an awder hôofd moar stoptege
          an awder voet’n.

  -       En wukken zinnekes woar’n da tan?

  -       Ewew Luuksken den burgemêestere zejt: “Gêenen mondmasker an op de Moart, moakt a tan moar uit
          de voet’n!” En Kriestofken zejt: “Da gezoag over de Zuidmoerstroate, dat hangt mijn voet’n uit!”
          Windèj hoat ôok een scheuntjen: “Zone 30 in a stroate? Gedoan mee den zwoare voet’n!”       

  -       En wukken zinneken hoa Bobken?

  -       “Nie content mee den middenbirme? Doar voag’n m’ons voet’n an!”

Marc Van Hulle

Tussen pot en pinte 35

“Teveel groene virwe”

-          Ah Achiel, ge zijt te loate hé manneken

-          Ja, Lowie kweetet, moar ‘k kwamme van de Roete, ‘k sleege de Meuje in en an Patsjellies mochtek nemêer deure.

-          Ah ja, daddis mee dienen knip dan ze doar nui in êenen kêer gemoakt hèn.

-          Ja jongne, kwamme doar in nen kroezele terechte: Engelendoale, Roashekke, Burggroave, miljaarde
           dat bleeft duur’n êer da’k an ’t Lejken woare. En tan stondek stille in de Guldenspôorenstroate.
           ’t Is doarmee da’k wa te loate zijn. Moar da nie allêene.

-          Aw Achiel, verteld op. Een nieuw lief?

-          Moar bènêen Lowie, een nieuw jobken!

-          Een jobken? Gij? Wirkte gij? Daddis inderdoad nieuws!

-          Lach moar, ik wirke nui vôor ’t stad!

-          Ah da verkloart vele, ge weet toch wew dadde ‘wirk’n’ en ‘’t stad’ nooit in êene zin meugt gebruik’n hé…

-          ’t Keun mij nie schiw’n. Luuksken en Kriestofken hèn mij gebewd en gevroagd ozzek nie wa wiwdege
            komm’n schiwderen.

-          Schiwderen? ‘k Wiste nie dadde gij mee nen virfbustele kost wirk’n!

-          Lowie, die mann’n schiwderen nemêer mee bustels hee, daddis nui mee spêetmachientjes en mee row’n.
           Da goa veel zêerdere.

-          En wa moeter allemow geschiwderd word’n, Achiel?

-          Ewew, de trottoirs en de boane!

-          Ah ’t lijntjes dadde gij schiwdert?

-          Nêetendoet, zijn dikke gekleurde striep’n mee letters!

-          Letters? STOP zekers?

-          Nêeje, an de schow’n emme mee veel kleurkes ‘Zone30’ geplakkoasterd! En an de buushawte op de Moart
           emme ‘peuktegels’ geploatst en geschiwderd!

-          Peuktegels? Wa zijn dadde?

-          Ewew, da zijn feitelijk grôote sandriejee’s in den trottoir gekapt. Doar meugen de rôokers awder peukskes
           of stekskes in smijt’n.

-          Ze zoen de mensen beter doen stopp’n mee rôok’n!

-          Aw moatjen, moar dat doeme ôok zille!

-          Ja, hoe dadde?

-          Ewew, omme gedoan hoan mee dienen kleurboek van ‘Zone 30’ vroegt den burgemêestere an mij ozzek
           mee rôoje virwe an iedere schowpôorte ‘Rookvrije zone’ wiwdege schiwderen. Der woas doar nen
           specioalen rôostere mee letters vôoren gemoakt. Da vaw nogaw op zille azô nen rôojen band!

-          En ister an ’t stad azô veel virwe in awder magazijn?

-          Joat jongne: fluo, oranje, rôod, veel blèw,… Moar der is êen hoeksken in ’t magazijn woar damme nie
           meugen ankomm’n.

-          Ha ja, en wa stoater doare?

-          Daddis Bob zijn hoeksken. Doar stoater verschrikkelijk veel groene virwe, en ôok azô nen letterrôostere
           gelijk van die ‘Rookvrije zone’. We gingen da rôostere en die groene virwe moet’n gebruiken op den
           deurtocht. Moar der is nui gevroagd vôor nog een beetjen te wacht’n. ’t Past niet echt langs den deurtocht
           wat datter op dienen rôostere stoat…

-          Wa stoater op toch Achiel?

-          Ewew: ‘Onkruidvrije zone’

    Marc Van Hulle

                                                                                         

                                                               Tussen pot en pinte 34

                                                                     Eemerance, ’t is vakanse!

-          Ha Achiel, nog awtijd schôone een mondmaskerken an?

-          Joak Lowie, ’t sewfs ozzek op café goa

-          Hoe goat da tan, os ge wiwt drinken?

-          Ewew Achiel, Eddie van Patsjellie van de Bakkerei van de Ramblas hee mij azô nen plastiekenen masker verkocht
           woarmee dadde keunt eet’n, drink’n, muil’n, ’t sews a tand’n kuis’n os ge da wiwt! En dienen maskere zette kik
           op ozzek op tramar goa!

-          Goe gezien Lowie, ‘k zoe mij ôok wew azô nen maskere goan kôop’n, moar ik goat nie an Eddie vroag’n zille,
           moar an Nagibatje, dedie goa mij dat ôok we wan d’hand doen pejzek?

-          Veel keure Achiel, ’t is nooit tevele gevroagd an heur! En vertew ne kêer: noar woar goade op rejze vandejoare?

-          Op rejze? Nuij? Mee aw die coronamiezeere? ‘k Blijvekik schôone thuis!

-          Ge ging gij toch wew weg goan mee Irma?

-          Joak jongne, mee nen mobielhoom noar Dardennen, moar daddis nui ne mêer nôdig!

-          Hoe wiwde zegg’n Achiel?

-          Ewew woarvôorn goa nen mens noar Dardennen, Lowie?

-          Vôor een Choefken te drink’n? En een stiksken everzwijn teet’n?

-          Ôok ja, moar toch vôoraw vôor in de bossen en de struik’n te goan wandelen?

-          Ja, daddis woar Achiel, vôor een wandelingsken in ’t groen!

-          Ewew Lowie, woarom zoeme doarvôorn nog noar Dardennen goan?

-          Om dander doar boss’n en struik’n à volonté zijn!

-          Ewew, dedie zijnder nui toch ôok in Eeklô?ess

-          Ja, in ’t Lêen zekers? Op die boantjes?

-          Nêeje Lowie, os ge een Ardennengevoel van een boswandelinge wiwt, moeje de middenbirme in de
           Stoassestroate en de Meulestroate ne kêer overstreek’n! Tussen de tingels en ’t onkruid pejsde sebiet
           da je in La Roche of Oefalieze an ’t wandelen zijt!

-          Haha, Achiel, daddis nog ne kêer vakanse in eigen stad!

-          Ja, en ’t keu nog betere!

-          Hoe wiwde zegg’n?

-          Ewew, we moeme nui ôok ne mêer noar de zêe! Rotjen schuiv’n op ’t strand en aw!

-          Ah ja, mee dienen hôop zand dan ze nui weere op de Moart gesmeet’n hèn? Eeklô Bietsj!

-          Ôok ja, Lowie, moar ’t keunt nog veel betere!

-          Da goa je mij toch ne kêer moeten uitlegg’n zille!

-          Ewew, ik hè mij pesseede weeke mee Irma in de greppe gezet!

-          In de greppe vanzeleejvne!

-          Ja jongne, ik hoa mijn spannend zwembroeksken an gedoan, Irma heuren biekienie, die hier en
           doare wew een moatjen mêer hoa keunen verdroag’n, moar ’t is vakanse hé.

-          Hè gawder azô in de greppe gezeet’n?

-          Ja be joam, en w’hemme ons ingesmeird van top toe têen vôor zeker nie te verbrand’n. We hoame een
           friegoboxken mee sandwieskes en een fris pintjen mee, we woarme nogaw gezet zille!

-          Moar woarom zatte gawder azô in de greppe?

-          Ewew Lowie, da woart omda Bobken da gevroagd hoat!

-          Bobken, wukken Bobken? Toch dienen groen’n nie, zekere?

-          Toch wew, Lowie, Bobken hé gezejd damme in de greppe an de riolle moet’n zitten.
            Bovenandien, ge kostet leejz’n os ge doar zat!

-          Ja, wa stond er doare?

-          Ewew, mee grôote letters stond er an de riolle: ‘Hier begint de zee’!

                                                                                 Marc Van Hulle

                                                                       




                                                             
                                                                 Tussen pot en pinte (33)

                                                                           
                                                                     “Kriestofken is den slimsten!”

-          Ha Achiel, ‘k moeste ne kêer goe kijk’n, want ‘k zoe a nie herkend hèn mee dienen mondmasker op a totte

-          Ja Lowie, zwijgt er mij van! ‘k Zwêete mij stêendôod mee dienen dingere an.

-          Daddis zjuust, moar ’t moet hé, vôor da KOVIETbeestjen!

-          Natuurlijk Lowie, moar de maskers hèn toch veel verschiw zille. Dedie van Club Brugge bijvoorbeeld, zijn hôw goed,
            ze spann’n niet an d’ôorn, ze dekk’n alles toe en aw de mens’n kijk’n vriendelijk noar a.

-          ‘k Zoet wew gelôov’n dan ze vriendelijk kijken os mee azô een spew van Brugge anlôopt.
           ‘k Pejze dan ze kompasse hèn!

-          Toch nie Lowie, daddis mee die mauvene van den Anderlecht, tan hèn ze leute!

-          Ik lôope mee dedie van ’t stad an. Ge weet wew, dedie die gekocht zijn dôor den Eeklôoschen Donawd Muille?

-          Den Eeklôoschen Donawd Muille, wien is dadde?

-          Ewew, Stêenbeke van de keukens vanop den Teut!

-          Ha, Kanon zijne zeune?

-          Zjuust Achiel! Moar ik hôore dan der verschillende soort’n geleejverd zijn!

-          Hoe wiwde zegg’n Lowie? Nen mondmaskere is toch nen mondmaskere?

-          Toch niet Achiel. ’t Schijnt dan die mondsmaskers vôor Niekolleken Demuntere twie kêern zo dikke zijn of d’andere!

-          Ja, woarom is dadde?

-          Ewew, vôor ’t lawèt os ze were ne kêer in de lach schiet! En dedie van Isauratjen zijn tsewfs mee nen extra fieltere!

-          Is dadde omdat een groene is?

-          Nieje Achiel, da woart vôor os de wirk’n an den Herbakkere zoen beginn’n da ze niet teveel gruis zoen binnenkrijg’n.

-          Ja, moar tan goa ze nog lange mee dienen masker meug’n lôop’n pejzek… Zeg, hèn ze vôor Loetsjen
           ôok nen specioale maskere?

-          Dendienen wiw gêene van ’t stad andoen, hij lôopt godgansche doag’n mee êenen van de Gantoise rond!

-          Van de Gantoise vanzeleejvne? Ist hij zô zêere achteruit an ’t goan?

-          Baneej, moar hij moet, van zijnen nieuwen boas: den VeeDeeKaa!

-          Daddis wat anders, vôor ne kêer dat hij luistert…

-          Moar weete gij wie dat de slimsten van gôw ’t stad is, Achiel?

-          Joak Lowie, da zaw Mejken zijn, de stadssecretair!

-          Nêeje Achiel, de slimsten van gôw den hôop is Kriestofken De Woale!

-          Da mêende nie! Hoe komde doarop?

-          Hij wist tsews aw joar’n damme mondmaskers gingen moet’n droag’n!

-          Joaj zekere? Hoe weete gij dadde?

-          Omdat hij aw joar’n mee zijnen briw op zijn hôofd lôopt, tan bedamp’n zijn ruit’n niet!

Marc Van Hulle

Kerstspew

-          Ha Achiel nen loaten zoaligen hôogdag hé moatjen!

-          Merci Lowie, vantsewfste. Een beetjen gevierd?

-          Oh, ’t woar kalme thuis. Een platjen van Ronnies binnengespeeld en tans nen gôolen oavend noar
           komedie op teevee gekeek’n.

-          Woarter komedie op teevee op Kèsoavend? Normoaw is da toch van de Sound of Mjoesiek mee
           aw die kientjes en da nonneken?

-          Joamoar Lowie, ik hoa nog wat dingen die’k opgepakt hoan en woar da’k tôope
           mee mijn wijveken noar gekeek’n hèn. En leute damme ghad hèn!

-          Ja, wa woaret toch?

-          Ik hoa nog wa èwe afleejvering’n van de gemêenteroad, van de laaifstrieming gelijk dan ze da noemdegen.
           Spijtig damme da nui nemêer te zien krijg’n.

-          Ha moar tan èk goe nieuws Achiel!

-          Ja wadde?

-          Ewew ik hè ghôord dan dedie van ’t schepencolleejze en de gemêenteroad tôope een kerstspew goan opvoer’n!
           En ik weete tsews wien da wie goa speel’n!

-          Nui moakte mij nieuwsgierig Lowie!

-          Jozef wordt gespeeld deur burgemêestere Luc en omdat een modeirn kerstspew is, droagt hij gêene lange mantele,
           moar een wit vestjen mee korte mewkes. Maria daddis Isauratjen en  z’is een beetjen over tijd.
           Moar z’is da geweune van mee den weirk’n an den Herbakkere hé.

-          Daddis zjuust.

-          Den herdere, daddis Bobken, die gôole doag’n in ’t gès noar zijn schoapkes zit te kijk’n.
           Hij hoa nog nen hulpherdere, Màtyàs, moar den dienen is noar nen anderen staw gelôop’n.

-          Aw zekere!

-          En dan zijnder de keuning’n mee kado’s. Keuning Marc hee gewd mee, nie vele moar toch genoeg om die
           kleinen van de zomere in ’t zand te keunen loaten speel’n. Keuning Kriestofken hee wierôok mee,
           moar draogt gêen kreuntjen moar zijnen briw op zijn hôofd.
           En keuning Dannie droagt nen rozen training en hee wa mee van Albert Heijn.

-          En wien ister ’t kientjen?

-          Awew, da woar nie simpele, moar ’t is de kleinste van den hôop geword’n: Anneken Van Den Driessche meug
           een pamperken andoen en op ’t strôot goan ligg’n.

-          Aw da vowk, kost’n dedie allemoaw binn’n in den herberg?

-          Jabejoas. Den boas hoat een poar moand’n tevôorn zijn prijzen opgesleeg’n, en doarom kwamter wa minder vowk.
           Gelukkig moar, want ’t kindeken kreeg aw rap bezoek!

-          Ja van wiene?

-          Een bende herders van an den owverkant kwam’n Jozef en Maria geluk wensen en ze brochten ôok kado’s mee.
           Herder Hilde hoa een rolle tuinafvawzakk’n mee. Herder Koentjen een bladkorve en
           reuzenherder Gertjan een bon vôor nen ballonvlucht.

-          Da zijn schôone kado’s. Doar woarn ze toch wew blij mee?

-          ‘k Weetet nie Achiel, want plots begostet vrêed te woaien! Alles wier weggebloajz’n!

-          Da vonden ze ôok wew nie leutig toch?

-          Joasendoen, ze vonden da wew OK!

-          Ha, Lowie, hoe komt dadde?

-          Ewew, ’t woar nen nieuwen wind…

Marc VAN HULLE

                                                   






                                                     Tussen pot en pinte 31

                                                                             Hij zit op zijn peird…

-          Hey Achiel, oe ister mee jongne?

-          Goed Lowie, goed. ‘k Voele mij volledig in forme!

-          Ha ja, hoe komt dadde?

-          Ewew, ik hè mij nen vélo gekocht!

-          Nen vélo, Achiel? Nen Harlie-steekt-hem-zewve?

-          Jip en ik hè nen vrêende slag gesleeg’n!

-          Ja, is êen mee nen batterie toch?

-          Banêet Lowie, da keu mijnen bruinen nie trekken zille!

-          Is êen van de Awdie of den Karrefoer?

-          Nêet jongne, ge zij mis. Tenandere, verkôopn ze zij doar ôok vélo’s?

-          Kweetet niet. Moar vertew mij ne kêer wukkenen slag dadde gesleeg’n hèt.

-          Ewew Lowie, ’t is een akkoaijze!

-          Een akkoaijze? Andermans mizeere wiwde zegg’n?

-          Toch niet, ’t is nen schôone vélo, goed onderhèwen en vôor een zocht prijsken!

-          Allez, ge moe gij nie schôone zijn vôor sjanse thèn hé?

-          Jaja, Lowie, lach moar. Ge zijt gij tsjaloes!

-          Joakendoen, hoe zoe kik tsjaloes moet’n zijn op iemand die nen vélo kôopt? ’t Is leen van mijn plechtige
           kommuune da’k nog ne kêer op azô wadde gezeet’n hèn.

-          Ge zoe beter een beetsje mêer mee den vélo goan rijen, da zoet a deugd doen.

-          Awawaw, Achiel, nie beginn’n gelijk Bobken hé? Ge goa mij niet verplicht’n vôor op nen vélo te kruip’n zille,
           ôok aw schiwderen ze vélopatt’n van drij meeters brêed.

-          ’t Is in alle gevaw goed vôor de kondiesse!

-          De kondiesse mijn ôore. Moar vertew ne kêer: dendienen van wie dadde dienen vélo in okkoajze gekocht hèt,
           moet dendienen nie an zijn kondiesse pejz’n?

-          Neej, hij hee gênen vélo nemêer nôdig.

-          Aw, hij is toch nie ziek of wadde?

-          Neej, moar hij rijdt nui mee iets anders!

-          Mee nen otto? Of mee nen brommere?

-          Nieje, mee een peird!

-          Mee een peird, vanzeleejvne. Da goa Bobken geiren hôorn! Dat is goed vôor de CO-twie. En os da peird ôok
           nog ne kêer schijt in de Stoassestroate, keuter hij de middenbirme mee bemest’n…

-          Lach moar, ’t is pertan nie vôor te lachen, dienen mens mee zijn peird!

-          Ha nêeje, wa schiwt er wew mee? Kennek hem toch?

-          Joag, ’t is Awbeir, de portrettentrekkere!

-          Awbeir? Woarom rijdt dienen vent nui mee een peird? Moet hij van Daniëlla toch?

-          Baneej, moar hij is riddere geword’n…

                                                                                         
                                                                                 Proficiat Albert!

                                                                       Marc Van Hulle, collega-ridder