Naar aanleiding van die herinnering maakte ik dit schilderij: Bij vader op de bok.

In de tied da’k op De Boomgaard wonen bun ik verscheidene keren met pa met ewes naor de Lindese mölle, een mooi ritjen aover de zandwaege, eerst oaver de Berkendiek, bie-j de Kruusdiek rechtsaf en dan bie-j Groote Haar weer links. Antink leet ie dan rechts liggen. Dan kwam ie-j langs Spekop en Jansen op de verharde Lindese weg. Rechts ha-j dan de gebroeders Baank achter zon mooie beukenhegge en links was de Kapellebult waor onze Henk al es te passe is ekommen met zien Zundapp toen e d’r effen aoverhen wol crossen. Anne van de Smid brach ‘em thuus, helemaole af’eschaafd, en Wim kon d’r zo met naor de dokter.
Langs de smid en van Asselt kwam ie dan bie-j de mölle. A-j geluk hadden waarn d’r nog andere kinder met ekommen en ha-j wat te spöll’n.
As kinder werde wie- altied Hetty en Diny van Hein en Coba van de Boomgaard enuumd. Dan ha-j ok de jonges van Spekop. Zo werden d’r meer naor hun boerderieje enuumd: Bertus van de Pegge, Aaltje van de Bievanck, kinder van de Klompenmaker, Jimmink,'t Waorle, Helderboom, Maolderink, de Leopoldhoeve, de Bonekamp. Maor ik hebbe nooit eheurd van de kinder van Lieferink. Dat bleef toch Lettink net als Koning en Breukink. Jao... zo was dat vrogger.
De Berkendiek heet noe Lieferinkweg. De olde menskes van Groote Haar bunt allange dood. Op Spekop woont ok gien Lenselink meer en wieterop ok gien Jansen. En vanzelf bunt de smid en van Asselt d’r al heel lange niet meer. Maor de mölle is t ’er nog, al wodt d’r gien rogge meer hen ebrach of eier en gien kunstmes of mengvoer meer ehaald, toch wodt 't Lindese feest daor nog altied ehollen in september.
De Lindese mölle is noe een Stichting ewodden en wodt veur lezingen en gezellige middagen gebruukt. Mot ik toch ok es hen.