't Is were zoverre,
de deure van 2015 stoat ip a gerre:
een hèèl nieuw joar
vo te leven met malkoar,
liefde in 't ménage tussen de vint en de vrouwe,
en is ter ol è ki miserie of boel,
smiet olleszins met gèn meubels, moar zet jen ip ne stoel
en loat het moar overwoaien, da rottig gevoel,
want oe da je 't ook droait,
't is dedju stille woar da 't noois een ki woait.
Zie je momenteel nog nie van de stroate,
gèn paniek, 't is ip da vlak noois nie te loate,
want wa zeggen ol die tupperweiredemonstranten
os ze geconfronteerd worden met under klanten:
'een dikken, een krommen, een schelen of een dullen,
ip ieder potje past er een ulle.'
Moar 'k willen junder ook nog 't een en 't ander wenschen;
'k wenschen junder wat da 'k zelve ook betrachten:
bie dage e bitje werk, en ruste bie nachte.
Os je oenger et, een kaste brood
en een slok uut de beke;
os je goeste et... een wuuf ip je schoot
met niet teveel gin streken.
Gin schulden tenzij deze da je effenan kunt
betalen met gepaste munt
en heel 't joar deure, lik of dat goat en stoat, geen pijn noch smerte
an je tanden of an 't herte.
'k Wenschen junder veel chance bie 't biljarten
en je vijanden veel jeuk en ne korten arm , dat ze nie kunnen scharten.
En kwestie van cadeaus: een doze pillen tegen darmkolieken
en een goe bril vo duere te kieken;
een pot konfieteure met niet veel gin additieven
en e schoane vulpenne vor alles op te schrieven.
Kortom, 'k wenschen joen 't beste vo 't noaste joare
en 'k goan 't doarbie loaten... vo vandejoare.
)
