|
TUSS’N POT EN PINTE
- Ah Achiel, hoe ist? Das lange leen hé?
- Ge meugt gerust zijn Lowie. Zeg moar ge ziet er zôo kontent uit? Hè ne kêer gemeug’n toch?
- Hela moatsjen op a woord’n lett’n hé!
- Joamoar, woarom druipt ’t kontentement azô van a totte? Ge blinkt gelijk een pielo-dôoze!
- Ewew, Irma is ter een poar doag’n vanondere!
- Irma? Mee nen anderen vent? ’t Hee nog lange geduurd!
- Moar nêen Achiel, zeveroare, z’is weg mee Femma!
- Mee Femma? Waddis dadde? Da klinkt gelijk iets vôor de schottels mee te wass’n!
- Zij moar verzichtig Achiel, moest’n ze dad hôor’n, ge zoe sebiet een lappetette krijg’n. Nieje, Femma daddis d’afkortinge
van Firme Evenement’n Mee Madams Allêene!
- Madams Allêene? Een bende gèsgêet’n tôope? Azô een erlewoasse, da moet doar vrêed leutig zijn…
- Ze noem’n dad ôok de wildewijvenbond, allée van hôor’n zegg’n hé…
- En wa doen dedie onze tôope zijn, Lowie? Kirrewiep moak’n? Of toatsespap? Of aloet speel’n?
- Nieje vent, ze komm’n vêele tôope vôor te kett’n. ‘Ontmoetingsoavend’ noem’n ze dadde…
- Jawadde doar moen ze mij nie vôorn wakkermoaken zille.
- Joamoar, Achiel, weete wa dan ze ôok nog doen? Blomschikk’n! En makramee! En hoak’n.
- Hoak’n? Wad hoak’n ze tan? Sloapmutsekes vôor twieling’n?
- Nieje Achiel, sutjeins hoak’n ze niet!
- Ge zoe pejz’n dan die awtijd moar zoen goan winkelen?
- ‘k Mêendege dat ôok, moar ze goan zjuust ne kêer noar Wijnegem vôor kèskadootjes te kôop’n.
- Pas tan moar op da nonkel Vieza nie mee is mee Irma!
- Die koarte hèk nui aw weggestook’n vôor alle zekerheid!
- Ja miljaar! En doen ze niets vôor ’t eet’n? Of zijn dat doar allemoale deurejoagers?
- Nêenêen, ze lêer’n ôok toarte bakk’n. Bij bakker Tom. Dendienen goat ôok nie weet’n wadatter hem owverkomt
onder azô twintig vrèwen rond zijnen owvene stoan te tetteren…
- Moar Lowie, bring’n ze die toarte ôok mee noar huis of sloan ze ze zewve binnen?
- Da pejzek wew, alhoewew, dedie moet’n toch op awder lijntjen lett’n? Moar ja, ze zijn geirne kontjekroaks hé?
- Iets anders, Lowie. Zitter doar wa schôon vowk tuss’n, bij dienen wildewijvenbond? Of zijn ’t er aw gelijk Irma?
- Wa wiwde doarmee zegg’n Achiel?
- Ewew, Irma is toch nen moageren schej. Ze geef gêen schoa nemêer. Os g’er een brôod noar smijt, kêeret gesnee’n were…
- ‘k Moe zegg’n Achiel datter doar toch wew ’t êen en ’t ander rondlôopt. ‘k Hè ons Irma weest’n afzett’n an den
buus voor ’t vertrek op wiekend en ‘k zagge doar toch een poar vlietige dingskes tussen zitt’n!
- Aw zekere Lowie, vertewt!
- Ewew, ’t lôop’n der doar toch een poar bij die goe vôorzien zijn van pôot’n en ôor’n.
Daddis bij sommigste gêen dakkapelle nemêer, moar een twieweunste! Mee veel vowk in de stoasse!
- Allee, ’t is nie gelijk bij Irma?
- Nêet jongne, bij Irma ister gêen vowk, der is tsewfs gêen stoasse nemêer… Moar da kindeken da neefest Irma
op den buus zat, dedie zoet mij ôok geen twie kêer’n moet’n vroag’n zille!
- Aw zekere Lowie, woast azô de moeite?
- Ge meugt gerust zijn. Doar zoe’k wew ne kêer mee op bezinningsmoment wiw’n goan zille!
Of een dôosken ossebloetjes mee eet’n!
- Ist azô een snelle beejze?
- Joat jongne. ‘k Goa mêer zegg’n: moester azô een muis op mijne zowder zitt’n, ‘k schoote mijn katte dôod!
Marc Van Hulle / Paul Van Hijfte-Ysebaert
|
Ik ben Everaert Albert, en gebruik soms ook wel de schuilnaam Awbeir (Eeklo's voor Albert).
