Heksen in Vlaanderen
Omme dieswille dat ghy Catharina de Craene, filia Oulters, oudt ontrent de sessenveertich jaeren, gheboren binnen der prochie van Ootighem ende jeghenwordich woonachtich binnen deser prochie van Heestert, u soo verre hebt vergheten nu gheleden ontrent de twintich jaeren te maecken compacxt met den duyvel der hellen soo den selven in den huyse van uwe laetste woonplaetse alhier binnen Heestert by u es ghecommen in de ghedaente van eenen jonghman ghecleedt met bruyne cleederen met eenen hoet met swarte pluymen, daer ghy waert sittende op eenen stoel by de tafel in de keucken van uwe voorseyde woonplaetse, als wanneer ghy waert treurende ende dubbende omme de goederen deser wereldt ende tghoone verganckelyck is. Alwaer de selven duyvel by u commende, u heeft ghevraecht of ghy wildet leeren tooveren midtsghaeders synne slave ende dienaresse syn. Waerop ghy hebt gheantwoordt dat jae. Naer welcken ghy metten selven uwen duyvel hebt ghegaen in de camer van den voorseyden uwen huyse op de koetse ende bedde daerinne wesende, ende metten selven uwen duyvel aldaer vleesschelyck gheboeleert, wiens saet ende nature ghy hebt ghevoelt kout te wesen.
...
recht doende met advise van rechtsgeleerden, hebben u Catherina de Craene voornoempt, ghecondempneert, soo sy u condempneren by desen gheleedt te worden ter plaetse patibulaire, aldaer ghestelt te worden op een hoochde aen eene staecke ende daeranne ghewoelt te worden datter de doodt naer volght ende daernaer tdoode lichaem verbrandt te worden totten asschen, confisquerende voorts alle uwe goederen, soo meubelen als immeubelen sheeren proffytte, de costen ende misen van justitie alvooren ghededuceert. Actum ter manynghe van de heer Anthoine de Cocq, bailliu ende wettelycke ma[e]nheere ende wysdomme van sheerens Arent van der Cruycen, Guillaeme de Cocq, Arent Raepsaet, Jacobus van Saceghem, Gheraert Moreau, Pieter van der Haeghen ende Jan Veys, leenmannen, desen achtienden meye XVIC sessentseventich.
http://users.skynet.be/lucos/
Middeleeuwen/middeleeuwrst.htm
http://www.kulak.ac.be/facult/rechten
/Monballyu/Rechtlagelanden/Homepage.htm
|