Ziezo, er is alweer een jaar voorbij. En dus wordt dit opnieuw een dialectweek.
Ik verontschuldig me bij al diegene die er niet veel van snappen, maar misschien komt dat nog wel. Of behoort dat soms niet tot de ‘inburgering’?
Alweer roep ik de Westendenaars op om mij eventueel te corrigeren. Ik zou er echt dankbaar voor zijn.
Hier gaan we dan!

Goju giedur soms nog no du kerumesu?
Wa zeg ju giedur: fooöru of kerumesu?

Gusjhieëdunisu
Witju giedur ijguntlik wel wienu da ‘kerumesu’ buteeëkunt? Dat is u vurbasturdeeriengu van kerkumesu! Worom? Omdat du kerumesu van oorsproenk u joörmart was bie guleegunijt van du wiediengsdag van u parochiekerku. Up die dag stroomdu tvoök tugoöru tur eeëru van du patroonijlugun, voe vurgifunisu tu vraagn, mor ook voe pluzieër tu maakn. In du grooëtu steedn is tvurband met du kerku oendurtusjhun vurwoöturt mor in somugu dorpn goöt ur nog asan u prosesju uut.

In de goeie noeden tied woarn me bliede dat were kerremesse was
Omme wieder kleeëne woarn keekn me wieder u geeël joar uut no tmoment dat de kraamn were gieng toekommn en da geeël torp were gieng riekn no frietn en smoetbolln.
Mo ja, toene was de kerremesse in u dorp eeën van de winnugge meugelukeedn voe ju tamuzeren, hé?
Uzze moedre deit de grooëte kuuste en bakte toartn want twas de gewente dat de verre famielje up bezoek kwaamt.
Eigentlik moenk toegeevn damme wel u bitje benouwd woaren van tkerremessevoëk. Aaltied mo roendrieën in weunwaagns met knechtn diedre bitje verdacht uutzaagn en under kienders die volgens uus noois no tschole giengn. Mu woaren doar nie aaltied gerust in.
Mu spoardn geil tjoar om u bitje drienkgeld ten teegn da tzoverre was. Petje en metje en peetre en meetre dostn ook alleki under portemonnee boovn aaln, tewoare da je droef gewist woöt.

In du kerumesweeku wiertur vanalus gorganieseert 
Da bugost met u speciale oogmesse en medu procesje. De zundagachternoene waster vielokoers. Lombartsiedde atoen twi koereurs die nog bie doenafhankelikkn, lik of data toene eeëtte, gereen en: Demeulenaere en Geryl.
De kaffees zaatn vul en dadde toet in de vroege urtjes. Twierd doa nogal u pientje verzet, wi.
En overal wierdn dur koartieng gorganiseeërd.
In de balzaaln, in de kasino bie Cyriel Couvreur met zun orgel en in ‘De Kroone’ bie Medard Derudder met u nakkordeong kostju gin oend u slag geevn. Twas ook tradiesje dat de joengens doar de beste kaanse haddn om u meisje an de naak te sloan. Zaddn u voorkeure voer intje uut Westende want ot dur eeên probeerde u meisje uut unandre gemeeênte, bevoorbeeld Lombartsiedde, te verleidn kreegtn ambras, met andere woordn ne liep tgevoar datn u pak slaagn kreeg.
Mo dur woarn ook nog andre aktiviteitn. He ju gieder nog nooit meegedoan an zakloopn of an uneierkoers? Dag geeëstig, wi! Tpaleklemmen adook vele suukses. Ju glotst doa gemakkelik of, hé, want zaddn zeeëpe an die pale gesmeeërd. De neeësten die boovn gegrocht was kreegt u pries.
U faanfaare adden mu nie mo dur kwaamt altied wel unorgeldroaier of, soms met unaptje mo da mocht toenie mi van de dierebeschermienge.

Dattrakties van de kerremesse zève
Westende a nateurlik gin groote markt wodat de kerremesse koste stoan. Doarom stoendn de kraamn in de Duuneweg. Taantal kraamn was dodeure ook noga beperkt.
Voe de klintjes woaren der de vielootjes en de peeërdemeuln met u flosje. Oju den deen ku pakkn meugje uki voe nieks meerieën. Ze kosten ook visschn achter uneendje of an u korretje trekkn metu kadootje dran.

De kaffiemeuln was ook geeëstig. Da schient u vergeetn kraam te zien want kosten gin foto dovan vienden.
Voe de grooëte aaju de schuuttn, de sliengerpies, de rupse en nateurlik de boksottoos met u stringe madam achter de kassa.

Dudeze die vroeg rieppe woaren vroegn an tmeisje van wien daan zu bitje zot woarn ossu met under in dezèfste notto wilde zittn. Deze die nog nie zo verre woarn bokstn altied teegn de notto worin dat tmeisje zat daan zuptooge adden.
Voer iedereeën eigentlik waster de bollosmietto en tschieëtkraam.

Trattekot, zeg jundr da nog etwat? O tratje deur tgatje liep me joen numero up, ha ju gewonn: u flesche (zeure) wien of unandr kadootje.
Ojoenger adde kost ju u zak frietn eetn of u zak met smoetbolln. Ju kost goet zieën wien datur van die bolln geetn adde, want zu woarn geeëlegaans bestrooid me witte poeier.

En watister doa van overgebleevn?
Deur de komste van vaste pretparkn en teenorm anbod van alle soortn evinnementn, koansers en feeëstn hen de kerremessen in de latste tientalln joarn langzaam mo zeekr an populariteit ingeboeêt. Ot dadde uzo verdergoat, zoet wel uki kunn zien dat da soorte van volksamusement ten dode upgeschreevn is. En da zoe toch stief jammer zien, hé.
In de dorpn is da nog zo erg nie, mor in de groddere steedn ister u groat verschil met vroegre.
In de tied stoend ju no de kraamn te kieken en te luustern no de muziek. Nu kuddet allemalle niet ard, oge, luudde, uutdaagndur en benouwelijk genoeg zien.

Voor vertaling van sommige woorden uit de tekst, zie:
http://users.skynet.be/Stam/lefevere/Blog/WestendsDialektHTML01032014.htm